Սայաթ-Նովայի անվան երաժշտական քոլեջում, այսօր կազմակերպված միջոցառմամբ, ավարտվեց ռուսական խոսքի օրերն Արցախում միջոցառումների շարքը:
Ավարտվեց ռուսական խոսքի օրերն Արցախում միջոցառումների շարքը (լուսանկարներ)
ՍՏԵՓԱՆԱԿԵՐՏ, 20 ապրիլի, ԱՐՑԱԽՊՐԵՍ: Միջոցառմանը բացման խոսքով հանդես է եկել Սայաթ-Նովայի անվան երաժշտական քոլեջի տնօրեն Կարինե Դադամյանը, ով կարևորել է ռուսական խոսքի օրերն Արցախում միջոցառումների անցկացումը:
«Արցախպրես»-ի թղթակցի հետ զրույցում ԱՀ կրթության, գիտության և սպորտի նախարար Սլավա Ասրյանն ասել է, որ միջոցառումը նպատակ ունի մեկ անգամ ևս ընդգծել հայ և ռուս ժողովուրդների դարավոր բարեկամությունը։
«Արցախում ռուսերենը հարգված և ընդունված լեզու է: Ռուսերենի ուսուցման և տարածման գործում կարևոր դեր ունեն ռուսաց լեզվի մասնագետները: Ռուսաց լեզվի դրվածքn Արցախում համարում ենք բավարար: Նման միջոցառումների միջոցով էլ աշակերտները հնարավորություն են ունենում ռուսերեն լեզվից իրենց ստացած գիտելիքներն ի ցույց դնել»,-նշել է Ս. Ասրյանը:
ԱՀ կրթության, գիտության և սպորտի նախարարության ռուսաց լեզվի գլխավոր մասնագետ Ռուբեն Օսիպովը շնորհակալություն է հայտնել ռուսական խոսքի օրերն Արցախում միջոցառումների կազմակերպիչներին և, մասնավորապես նշել. «Արցախի դպրոցներում ռուսաց լեզվի դասավանդումն իրականացվում է բարձր մակարդակով: Աշակերտներն արտահայտում են իրենց սերը ռուսաց լեզվի նկատմամբ: Ռուսական խոսքի օրերն Արցախում միջոցառումը ևս մեկ խորհրդանիշ է հայ և ռուս ժողովուրդների հոգևոր հարազատության, բարեկամության»:
Միջոցառմանը Սայաթ-Նովայի անվան երաժշտական ուսումնարանի սաների, «ՎԵԼԱՆՍ» երաժշտական համույթի կատարմամբ հնչել են հայերեն և ռուսերեն ստեղծագործություններ:
Միջոցառմանը ներկա էին ԱՀ Ազգային ժողովի պատգամավորներ, ուսուցիչներ, աշակերտներ, հյուրեր և այլք:
Նշենք, որ ռուսական խոսքի օրերն Արցախում միջոցառումների մեկնարկը տրվել է ապրիլի 18-ին Ստեփանակերտի Ալեքսանդր Գրիբոյեդովի անվան N 3 հիմնական դպրոցում, որը մեծ ավանդ ունի ռուսական լեզվի տարածման ու զարգացման գործում։