Կարծում եմ, որ մեզ համար ժամանակային եզրեր չպետք է դնենք, որովհետև Հայոց Ցեղասպանության ճանաչման գործընթացը երկարատև պայքար է:
Ցեղասպանության ճանաչման գործում ժամանակային եզրեր չպետք է դնենք. Աշոտ Ղուլյան
ՍՏԵՓԱՆԱԿԵՐՏ, 24 ապրիլի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ԱՀ Ազգային Ժողովի նախագահ Աշոտ Ղուլյանը:
«Հարյուրամյակից այս կողմ, իսկապես, իրավիճակն այնպիսին է, որ Ցեղասպանության ճանաչման հետապնդումը ոչ միայն հայ ժողովրդին է պետք, այլ նաև՝ աշխարհում տեղի ունեցող բոլոր ոճրագործությունների դեմն առնելու և նոր մարտահրավերներին դիմակայելու համար:
Կարծում եմ՝ ինչքան էլ տարօրինակ հնչի, Ցեղասպանության ճանաչումը և հատուցումը շատ ավելի պետք է Թուրքիային: Իրողությունն այնպիսին է, որ Թուրքիայում տեղի ունեցող զարգացումներն ու հատկապես Ցեղասպանության ժխտումը կամա թե ակամա այս երկրին տալիս է տարածաշրջանային ահաբեկչությունների կազմակերպիչ և մասնակից երկրի կարգավիճակ:
Այդ է վկայում Սիրիայում տեղի ունեցող իրադարձություններին նրա անմիջական մասնակցությունը, Ադրբեջանի կողմից ձեռնարկվող ահաբեկչական գործողություններին նրանց՝ եթե ոչ ուղղակի, ապա անուղղակի մասնակցությունը»,- ասել է Ա. Ղուլյանը և հավելել, որ վստահ է, որ ամեն տարվա ապրիլին խոնարհվելով, խնկարկելով և ոգեկոչելով մեր սրբադասված նահատակներին՝ շատ մեծ գործ ենք անում՝ ի պաշտպանություն նաև մարդկության պահանջատիրության, որպեսզի ոչ մի երկիր չկրկնի և չունենա այնպիսի ողբերգական իրադարձություն, ինչպիսին է Հայոց Ցեղասպանությունը: