Բրյուսելում անցկացվել է Հայաստան-ԵՄ համագործակցության խորհրդի 17-րդ նիստը՝ ԵՄ արտաքին գործերի եւ անվտանգության քաղաքականության գերագույն հանձնակատար Ֆեդերիկա Մոգերինիի նախագահությամբ:
Մոգերինի. ԵՄ-ն պատրաստ է Հայաստանի հետ համագործակցության ընդլայնմանը եւ խորացմանը
ՍՏԵՓԱՆԱԿԵՐՏ, 23 մայիսի, ԱՐՑԱԽՊՐԵՍ: Հայկական պատվիրակությունը ղեկավարել է ԱԳ նախարար Էդվարդ Նալբանդյանը:
Եվրամիության հայտարարության մեջ նշված է, որ կողմերը ողջունել են վերջերս նախաստորագրված ԵՄ-ի եւ Հայաստանի միջեւ համապարփակ եւ ընդլայնված գործընկերության մասին համաձայնագրի շուրջ բանակցությունները եւ կոչ են արել այն արագ ավարտել:
«Այսօր մենք քննարկել ենք մեր հարաբերություններում հաջորդ քայլերը: ԵՄ-ն պատրաստ է Հայաստանի հետ համագործակցության ընդլայնմանը եւ խորացմանը»,- հանդիպումից հետո հայտարարել է Մոգերինին:
Հայաստանի ԱԳ նախարարն իր հերթին նշել է, որ Խորհրդի նիստը շատ հաջող է անցել: «Մենք Հայաստանի եւ ԵՄ-ի միջեւ գործընկերության եւ համագործակցության խորացման հույս ունենք»,- հայտարարել է նա:
Խորհուրդը նաեւ ողջունել է Հայաստանի եւ ԵՄ-ի միջեւ օդային տրանսպորտի մասին համապարփակ համաձայնագրի շուրջ բանակցությունների մեկնարկը եւ հնարավոր բոլոր ոլորտներում հետագա համագործակցության կոչ արել:
Կողմերն անհամբերությամբ են սպասում գործընկերության համատեղ առաջնահերթությունների շուտափույթ նախանշմանը, քանի որ դրանք առանցքային դեր են ունենալու 2017-2020 թվականներին Աջակցության միասնական մեխանիզմի ծրագրի հաջորդ փուլոի շրջանակում Հայաստանին Եվրամիության աջակցության ձեւավորման հարցում:
Խորհուրդը քննարկել է Հայաստանում իրականացված վերջին քաղաքական, տնտեսական եւ սոցիալական բարեփոխումները: ԵՄ-ն ի գիտություն է ընդունել այդ բարեփոխումների իրականացման ճանապարհին ձեռք բերված առաջընթացը եւ դրանք դրական հունով շարունակելու հարցում Հայաստանի հավատարմությունը, ինչպես նաեւ կոչ է արել արագացնել բարեփոխումներն առանձին ոլորտներում:
Եվրամիությունում հիշեցրել են, որ վերջին խորհրդարանական ընտրությունների ժամանակ գրանցված թերությունները պետք է հավուր պատշաճի քննարկվեն: ԵՄ-ն կոչ է արել անաչառ, վստահություն ներշնչող եւ արդյունավետ հետաքննություն վարել մարդու իրավունքների բոլոր ենթադրյալ դեպքերով՝ ներառյալ 2016 թվականին «Էրեբունու ճգնաժամի» ընթացքում ոստիկանության ոչ իրավաչափ գործողությունների մասին հաղորդումները: ԵՄ-ն նաեւ այդ գործով կալանավորվածների արդար դատաքննություն անցկացնելու կոչ է արել:
Բրյուսելում նշել են, որ կոռուպցիայի դեմ մշտական համաձայնեցված պայքար է անհրաժեշտ եւ օրենքի գերակայությանը վճռական աջակցություն:
ԵՄ-ն Հայաստանին երախտագիտություն է հայտնել «Արեւելյան գործընկերության» շրջանակային ծրագրին մասնակցության համար եւ Հայաստանի ակտիվ ու կառուցողական դիրքորոշման հույս ունի՝ հունիսի 19-ին Լյուքսեմբուրգում «Արեւելյան գործընկերության» անդամ երկրների ԱԳ նախարարների հանդիպման եւ նոյեմբերի 24-ին Բրյուսելում նախանշված գագաթնաժողովի նախապատրաստման գործում:
Նիստի ընթացքում քննարկվել են տարածաշրջանային հարցեր, ինչպես նաեւ ղարաբաղյան հակամարտության կարգավորման հեռանկարները: