Այսօր Արցախի պետական համալսարանում հյուրընկալվել է «Ավրորա 2016» մրցանակաբաշխության դափնեկիր Մարգարիտ Բարանկիցեն:
Մարգարիտ Բարանկիցեն հյուրընկալվել է ԱրՊՀ-ում
ՍՏԵՓԱՆԱԿԵՐՏ, 23 մայիսի, ԱՐՑԱԽՊՐԵՍ: Արցախպրես»-ի թղթակցի հաղորդմամբ՝ մինչ միջոցառումը՝ Մարգարիտ Բարանկիցեի գլխավորած պատվիրակությունը, ԱՀ մշակույթի և երիտասարդության հարցերի նախարար Նարինե Աղաբալյանը, համալսարանի պրոֆեսորադասախոսական կազմը ծաղիկներ են խոնարհել արցախյան ազատամարտում ԱրՊՀ զոհված ուսանողների հիշատակը հավերժացնող հուշաքարին:
Միջոցառմանը բացման խոսքով հանդես է եկել ԱրՊՀ ռեկտոր Մանուշ Մինասյանը, ով ողջունել է Մարգարիտ Բարանկիցեի գլխավորած պատվիրակության այնցն Արցախ:
«Բուրունդիի քաղաքացիական պատերազմի տարիներին հազարավոր կյանքեր է փրկել՝ խնամելով որբերի ու փախստականների։ Ազգությամբ թութսի Բարանկիցեն պատերազմի սկզբում հետապնդումից փրկելու նպատակով փորձել է թաքցնել ազգությամբ հութու 72 ամենամոտ հարեւաններին, սակայն, երբ նրանց գտել են, բոլորին տեղում սպանել են՝ դրա բռնի ականտեսը դարձնելով նաեւ Բարանկիցեին։ Այս դաժան միջադեպից հետո Մարգարիտն իր կյանքը նվիրել է փախստականներին և երեխաներին խնամելու գործին։ Նա ընդհանուր առմամբ փրկել է 30,000 երեխայի: Նա 2008 թվականին հիվանդանոց հիմնել, որտեղ մինչ օրս բժշկական օգնություն է ստացել 80,000 մարդ»,-ընդգծել է Մ. Մինասյանը:։
Նարինե Աղաբալյանն իր խոսքում կարևորել է Մարգարիտ Բարանկիցեի մարդասիրական առաքելությունը և մասնավորապես նշել.«Արցախցիներս շատ լավ գիտենք, թե ինչ է նշանակում օգնության ձեռք մեկնել մարդկանց, ովքեր կորցրել են անգամ վերջին հույսը: Մենք բազում փորձություններ ենք արժանապատվորեն հաղթահարել: Այսօր դուք էլ, ձեր փորձով, մեր երիտասարդներին կներկայացնեք, թե ինչպես պետք է հաղթահարել խոչընդոտներն ու դժվարությունները»:
Պատվիրակության կազմում էր նաև «Ավրորա» մարդասիրական նախաձեռնության ղեկավար Արման Ջիլավյանը, ով իր ելույթում ներկայացրել է մրցանակաբաշխության մանրամասները:
Մարգարիտ Բարանկիցեն էլ իր խոսքում մանրամասն պատմել է թե ինչպիսի ճանապարհ է անցել ինքը և ինչպես է դարձել «Ավրորա» մարդասիրական մրցանակաբաշխության դափնեկիր:
«Ես տպավորված եմ Արցախով և արցախցիներով: Տեսնելով, այսքան շատ երիտասարդներ վստահությամբ կարող եմ ասել, որ այս երկիրը պետք է ապրի ու բարգավաճի, քանի որ երկրի ապագան կերտողները երիտասարդներն են»,-մասնավորապես նշել է Մ. Բարանկիցեն:
Միջոցառմանը ցուցադրվել է Մարգարիտ Բարանկիցեի գործունեության մասին պատմող տեսանյութ:
Հանդիպմանը ԱրՊՀ ռեկտոր Մ. Մինասյանը Մարգարիտ Բարանկիցեին խորհրդանշական հուշանվերներ, գրքեր և ծաղիկներ է նվիրել:
Միջոցառման վերջում ներկաները հարցեր են ուղղել Մարգարիտ Բարանկիցեին: