Այն, ինչ կոչվում է ԼՂՀ ստատուս-քվո, նշանակում է տարածք, որը պատկանում է մի ժողովրդի, նրա ռազմաքաղաքական վերահսկողության տակ է, սակայն այդ տարածքի վրա բոլոր իրավունքները ճանաչվում են հօգուտ Ադրբեջանի:
Ադրբեջանին պետք է զրկել ԼՂՀ վրա ունեցած բոլոր իրավունքներից. քաղաքագետ
ՍՏԵՓԱՆԱԿԵՐՏ, 25 մայիսի, ԱՐՑԱԽՊՐԵՍ:Ամբողջ աշխարհը այդ տարածքն իրավաբանորեն ճանաչում է որպես Ադրբեջանի մաս: «Ապրիլյան պատերազմից մեկ տարի անց. վիճաբանություններ արցախյան ստատուս-քվոյի շուրջ» թեմայով այսօր կայացած քննարկման ժամանակ նման տեսակետ հայտնեց քաղաքագետ Մանվել Սարգսյանը, հայտնում է panorama.am-ը:
«Ադրբեջանն ամեն օր խոսում է այդ տարածքի մասին՝ ասելով «Դա մեր ներքին գործն է, որևէ մեկն իրավունք չունի միջամտել այդ գործին: ՄԱԿ-ի կանոնադրության 51-րդ կետով մենք իրավունք ունենք օրինական կերպով զենք կիրառել այդ տարածքը վերադարձնելու համար»:
Սրա դեմ ոչինչ չի ասվում, միայն ասվում է, որ այդ երկիրը, հանդիսանալով ՄԱԿ-ի և ԵԱՀԿ-ի անդամ, պարտավորություն է ստանձնել խնդիրը լուծել խաղաղ ճանապարհով: Երբ ասում են փխրուն վիճակ, դա վերաբերում է հենց առկա վիճակին: 25 տարի է ՝ ԵԱՀԿ Մինսկի խումբն առաջարկում փոխել ստատուս-քվոն մեկ այլ ալգորիթմով՝ ճշտել որոշ տարածքների կարգավիճակը, որոշ տարածքներն էլ վերադարձնել Ադրբեջանին: Այդ երկիրն օգտվում է այն հանգամանքից, որ ամբողջ աշխարհն այդ տարածքը ճանաչում է որպես իր սուվերեն պետության մաս: Ադրբեջանը միայն սրա վրա է հենվում»,- ասաց բանախոսը՝ հավելելով, որ հայկական կողմը մշտապես կատաղի պայքար է տվել Արցախի ճանաչման հարցի դեմ:
Մանվել Սարգսյանի խոսքով, ՀՀ քաղաքականության գործը պետք է լինի Ադրբեջանին զրկել ԼՂՀ վրա ունեցած բոլոր իրավունքներից:
«Բանակցային գործընթացը դարձել է բուրգ: Գոյություն ունի մի տաբու, որը խանգարում է ավարտին հասցնել այս գործընթացը: Ապրիլյան պատերազմի ժամանակ աշխարհը չդատապարտեց Ադրբեջանին՝ նրան հիշեցնելով, որ նա պետք է պաշտպանի իր իրավունքները: Հիմա, մեր գործն է նրան զրկել այդ իրավունքներից»,- ամփոփեց քաղաքագետը:
