ԱՀ ոստիկանության պետ, գեներալ-մայոր Կամո Աղաջանյանն ընդունել է ՀՀ ոստիկանության ճանապարհային ոստիկանության պետ, ոստիկանության գնդապետ Եգոր Կարապետյանի գլխավորությամբ Արցախ ժամանած պատվիրակությանը։
Կամո Աղաջանյանը պարգևատրել է ՀՀ ճանապարհային ոստիկանության պատասխանատուներին
ՍՏԵՓԱՆԱԿԵՐՏ, 27 մայիսի, ԱՐՑԱԽՊՐԵՍ: ԱՀ ոստիկանության մամլո ծառայության փոխանցմամբ՝ ոստիկանության պետը, գոհունակություն հայտնելով ՀՀ ոստիկանության պետ, ոստիկանության գեներալ-գնդապետ Վլադիմիր Գասպարյանին` Արցախի Հանրապետության ոստիկանության նկատմամբ ցուցաբերվող հոգածության և ուշադրության համար, համոզմունք է հայտնել, որ այսուհետ երկու իրավապահ կառույցների ճանապարհային ոստիկանությունների կողմից կարվի ավելին՝ մեր հասարակության անվտանգ երթևեկության լիարժեք ապահովման համար։
ԱՀ ոստիկանության պետի հրամանով` ՀՀ ոստիկանության ճանապարհային ոստիկանության պետ Եգոր Կարապետյանը և պատվիրակության մյուս երկու անդամները պարգևատրվել են «Համագործակցության ամրապնդման համար» մեդալով։
ՀՀ ոստիկանության ճանապարհային ոստիկանության պատվիրակության անդամները հանդիպում են ունեցան նաև ԱՀ ոստիկանության ճանապարհային ոստիկանության ծառայողների հետ։ Մտքերի փոխանակման միջոցով քննարկվել են պրակտիկ և իրավիճակային մի շարք հարցեր։ ՀՀ ոստիկանության ճանապարհային ոստիկանության իրավաբանական բաժնի պետի կողմից ներկայացվել են ճանապարհային ոստիկանության գործունեությունը կանոնակարգող մի շարք օրենսդրական նախագծերի վերաբերյալ դրույթներ՝ դրանց առնչությամբ լսելով Արցախի գործընկերների կարծիքները։
ՀՀ ոստիկանության գործընկերները դատարկաձեռն չէին եկել։ ԱՀ ոստիկանության ճանապարհային ոստիկանության ծառայողների համար իրենց հետ բերել էին մասնագիտական գրականություն և լուսաանդրադարձող բաջկոններ։ Բացի այդ, նյութական աջակցություն են ցուցաբերել պաշտպանության բանակին և կազմակերպել պաշտպանության բանակում ծառայող զինվորների ծնողների այցելությունը զորամասեր։