Ստեփանակերտի ուռուցքաբանության նոր կենտրոնի բժշկական սարքավորումներն ավելի թանկ կարժենան, քան դրա շինարարությունը:
Ստեփանակերտի ուռուցքաբանության կենտրոնի սարքավորումներն ավելի թանկ կարժենան, քան շենքի շինարարությունը
ՍՏԵՓԱՆԱԿԵՐՏ, 27 մայիսի, ԱՐՑԱԽՊՐԵՍ: Այս մասին NEWS.am Medicine-ի հետ զրույցում ասաց «Հայաստան» համահայկական հիմնադրամի ֆրանսիական մասնաճյուղի ներկայացուցիչ Հարություն Գեւորգյանը, որի շնորհիվ բժշկական կենտրոնի շինարարությունը հնարավոր դարձավ:
Բժշկական կենտրոնի շինարարությունն ավարտվել է վերջերս եւ արժեցել մոտ 1,5-2 մլն դոլար, որի մեծ մասը նվիրաբերել է Ֆրանսիայից դոնոր Ռիշար Հովհաննիսյանը: Սակայն մինչեւ այցելուների համար հիվանդանոցը բացելը, անհրաժեշտ է այն ապահովել ժամանակակից բժշկական սարքավորումներով, ինչպես նաեւ մասնագետներին վերապատրաստման ուղարկել:
Հարություն Գեւորգյանը նշեց, որ ուռուցքաբանության կենտրոնի համար անհրաժեշտ բոլոր սարքավորումների գնումն ավելի թանկ կարժենա, քան կենտրոնի շինարարությունը, սակայն առայժմ դժվար է կոնկրետ գումարի մասին խոսել: Համահայկական հիմնադրամի ֆրանսիական մասնաճյուղի ներկայացուցիչները հույս ունեն, որ անհրաժեշտ սարքավորման մի մասն իրենց կնվիրի Ֆրանսիայի կառավարությունը: Հարություն Գեւորգյանը նշեց, որ Ֆրանսիայում մեծ թվով խոշոր պետական բժշկական կենտրոններ կան, որոնք երեք տարին մեկ բոլոր սարքավորումները թարմացնում են: «Հնի», բայց սարքին գործող եւ այժմեականությունը չկորցրած, մի մասն ավելի շուտ կնվիրեն Ստեփանակերտի ուռուցքաբանության կենտրոնին:
Պակասող սարքավորումներն արդեն հարկ կլինի գնել: Հարություն Գեւորգյանը նշեց, որ հիմնադրամը հավանաբար կկարողանա դրա համար միջոցներ հայթայթել. հիվանդանոցը եւ բժշկական սարքավորումների գնումը կարելի է դասել այն նախագծերին, որոնց համար դժվար չի լինի ֆինանսավորում գտնել, քանի որ խոսքը մարդկանց կյանքի եւ առողջության մասին է:
Ինչ վերաբերում է մասնագետների վերապատրաստմանը, որոնք պետք է աշխատեն ուռուցքաբանության կենտրոնում, վիրաբույժներից մեկը վերջին 9 ամիսներին Ֆրանսիայում է եղել, որտեղ սովորել է եւ իր վարպետությունը հղկել: Մյուս մասնագետները նույնպես պետք է վերապատրաստում անցնեն, սակայն դեռեւս ճշգրիտ տեղեկություններ չկան՝ ով, որտեղ եւ երբ: Ավելին՝ երբ հիվանդանոցն սկսի աշխատել, ամենայն հավանականությամբ Ֆրանսիայից մասնագետները կմեկնեն այնտեղ եւ հայ բժիշկներին կօգնեն ու կսովորեցնեն:
Բժշկական կենտրոնի ընդհանուր տարածքը մոտ 2520 քառակուսի մետր է: Շենքը 3 հարկ ունի, 35 մահճակալ: Կա նաեւ 16 մահճակալով հատուկ անվտանգ գոտի, որտեղ հնարավոր կլինի բուժվել նաեւ ռազմական գործողությունների ժամանակ: Հիվանդանոցը կունենա սովորական եւ պատոմորֆոլոգիական լաբորատորիա, ռենտգեն, մամոգրաֆիա, ինտենսիվ թերապիայի, քիմիաթերապիայի բաժանմունքներ, ինչպես նաեւ վիրաբուժական բաժանմունք: