Այսօր կարևորվում է ժամանակակից մեթոդներով դասավանդման հարցն և ուսուցման նոր՝ արդեն աշխարհում տարածում ստացած մոտեցումների կիրառումը:
Արցախում կազմակերպվելու է ուսուցիչների վերապատրաստում. «Գիտելիքը ուժ է» կրթական նախաձեռնության հեղինակ
ՍՏԵՓԱՆԱԿԵՐՏ, 26 հունիսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է «Գիտելիքը ուժ է» կրթական նախաձեռնության հեղինակ Անուշ Եդիգարյանը՝ նշելով, որ Արցախում այն կյանքի կոչելու համար ԱՀ վարչապետի և կառավարության ներկայացուցիչների հետ հանդիպումների ժամանակ էլ առաջ է քաշվել արցախցի ուսուցիչների վերապատրաստման դասընթացների կազմակերպման հարցը:
«Մենք փորձում ենք Արցախում կրթության զարգացման գործում մեր ներդրումն ունենալ: Ուսուցիչների վերապատրաստման ծրագիրը հավանության է արժանացել Արցախի կրթության, գիտության և սպորտի նախարարության կողմից: Այս կրթական նախաձեռնության նպատակն է ուսուցիչների ուշադրությունը հրավիրել ժամանակակից այն մեթոդների վրա, որոնք ներկայումս կիրառվում են աշխարհի առաջատար երկրների կրթական համակարգում, ինչպես նաև՝ երեխաների շրջանում հետաքրքրություն առաջացնելն այն առարկաների նկատմամբ, որոնք ընկած են լինելու մասնագիտական կողմնորոշման հիմքում,-ասել է Ա. Եդիգարյանը և ավելացրել,-ուսուցիչների վերապատրաստման դասընթացների առաջին փուլը մեկնարկելու է հուլիսի 29-ին՝ Մարտունու շրջանի Գիշի գյուղում, հաջորդ փուլը՝ Ստեփանակերտում՝ օգոստոսի 8-ին: Դասընթացներին կմասնակցի շուրջ 120 ուսուցիչ»:
«Գիտելիքը ուժ է» կրթական նախաձեռնության հեղինակի խոսքով՝ դասընթացները նախատեսված են միջին և ավագ դպրոցի ֆիզիկայի, քիմիայի, կենսաբանության, մաթեմատիկայի, ինֆորմատիկայի ուսուցիչների, ինչպես նաև դասվարների և հումանիտար առարկաների ուսուցիչների համար:
«Որպես ուսուցանողներ՝ դասավանդման և ուսուցիչների վերապատրաստմանը ներգրավվել ենք հարուստ փորձ ունեցող մասնագետներ, ովքեր սովորել կամ կատարելագործվել են արտերկրում։ Ըստ իրենց նախասիրությունների՝ ուսուցիչները կարող են մասնակցել 2 դասընթացի. առաջին՝ ուսուցման ժամանակակից մեթոդներ և տեխնոլոգիաներ, այդ թվում՝ STEM կրթություն (Science, Technology, Engineering, Math, կամ՝ գիտություն, տեխնոլոգիա, ճարտարագիտություն, մաթեմատիկա), այն տևելու է երեք օր ՝ հուլիսի 29-31-ը Մարտունու շրջանում և օգոստոսի 8-10-ը՝ Ստեփանակերտում: Երկրորդ՝ հոգեբանական մոտեցումներ, այդ թվում՝ դրական հուզական փոխհարաբերությունների ձևավորում ու զարգացում, դրական մթնոլորտի ապահովում հոգեբանական հնարքների և խաղերի միջոցով. Մարտունիում այն կազմակերպվելու է հուլիսի 29-30-ը, իսկ Ստեփանակերտում՝ օգոստոսի 8-9-ը»,-հավելել է Ա. Եդիգարյանը:
