Հուլիսի 3-ից Արցախի «Հայկի Սերունդ» հասարակական կազմակերպության նախաձեռնությամբ Շուշիում մեկնարկելու է «Հայորդիներ» սկաուտական VIII բանակումը. այն տևելու է մինչև օգոստոսի 10-ը:
Շուշիում մեկնարկելու է «Հայորդիներ» սկաուտական ամենամյա բանակումը
ՍՏԵՓԱՆԱԿԵՐՏ, 26 հունիսի, ԱՐՑԱԽՊՐԵՍ: «Արցախպրես»-ի թղթակցի հետ զրույցում «Հայկի Սերունդ» ՀԿ արտաքին կապերի գծով փոխնախագահ Երվանդ Հաջիյանն ասել է, որ պատանիների և երիտասարդների հայրենասիրական դաստիարակությանն ուղղված այս ամենամյա միջոցառումը նախատեսված է անցկացնել չորս փուլով. յուրաքանչյուր փուլ կտևի 9 օր:
«Առաջին երեք փուլերում ընդգրկվելու են Ստեփանակերտի և Արցախի շրջանների պատանիներ և երիտասարդներ: Իսկ օգոստոսի 2-10-ն՝ մասնակցելու են նաև Հայաստանից և սփյուռքից ժամանած սկաուտներ։ «Հայորդիներ» սկաուտական բանակումի ընթացքում նախատեսվում է կազմակերպել տարաբնույթ միջոցառումներ՝ սեմինարներ, մարզական և իմացական խաղեր, մրցույթներ, խարույկահանդես, մշակութային երեկոներ, հանդիպումներ հայտնի մարդկանց հետ, արշավներ և այլն: Միջոցառման նպատակն է՝ խթանել Արցախում «Հայորդիներ» սկաուտական շարժման զարգացմանն ու տարածմանը, նպաստել աճող սերնդի հայեցի դաստիարակությանը, ինչպես նաև Շուշին դարձնել համահայկական և միջազգային երիտասարդության հավաքատեղի»,-մանրամասնել է Ե. Հաջիյանը և ավելացրել, որ «Հայորդիներ» սկաուտական բանակումներն Արցախում իրականացվում են 2010 թվականից։
Ե. Հաջիյանի տեղեկացմամբ՝ տարեցտարի ընդլայնվում է մասնակիցների թվաքանակը և աշխարհագրությունը։ Իրենց հերթին՝ արցախցի սկաուտները մասնակից են լինում Հայաստանում և Իրանում կազմակերպվող սկաուտական բանակումներին։ «Հայկի Սերունդ» կազմակերպությունը նպատակադրված է համագործակցություն հաստատել նաև այլ երկրների սկաուտական կազմակերպությունների հետ:
