Հայաստանի Հանրապետության առողջապահության նախարարության գլխավոր մանկական ուրոլոգ, «Արաբկիր» բժշկական համալիրի վիրաբուժության գծով տնօրենի տեղակալ Սերգո Բաբլոյանն այսօր Ստեփանակերտի «Արևիկ» մանկական բուժմիավորումում իրականացնում է երեխաների անվճար հետազոտություն, խորհրդատվություն ու անհրաժեշտության դեպքում էլ վիրահատություն:
«Արաբկիր» բժշկական համալիրի բժիշկը Ստեփանակերտում իրականացնում է անվճար վիրահատություններ
ՍՏԵՓԱՆԱԿԵՐՏ, 14 հուլիսի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Սերգո Բաբլոյանն ասել է, որ իր այցի հիմնական նպատակը կապված է ուրոլոգիական հիվանդների հետազոտման և բուժման խնդիրների հետ:
«Երկար տարիներ է, ինչ մենք համագործակում ենք «Արևիկ» մանկական բուժմիավորման հետ: Համագործակցության ընթացքում բավականին լուրջ քայլեր են արվել, որը, միանշանակ, ակնառու է և ողջունելի: Տեղի մասնագետների մոտ բավական մեծ առաջընթաց է նկատվում. այստեղ արդեն մի շարք բարդ վիրահատություններ են իրականացվում: Մեր այցի նպատակը նաև տեղի բժիշկների հետ խորհրդակցություն անցկացնելն է և նրանց ուրոլոգիայի ոլորտում բժշկական վերջին նորություններին ծանոթացնելը,-ասել է բժիշկը և շարունակել,- «Արաբկիր» բժշկական համալիրում մենք պարբերաբար կազմակերպում ենք գիտաժողովներ, որտեղ հանդես են գալիս արտերկրից ժամանած մասնագետները. այդ միջոցառումներին մենք միշտ մասնակից ենք անում նաև արցախցի մեր գործընկերներին»:
Խոսելով հիվանդությունների մասին՝ Ս. Բաբլոյանն ասել է, որ հետազոտությունների ընթացքում իրենք հանդիպում են զանազան հիվանդությունների, որոնց մեծ մասը բնածին արատներ են:Եռօրյա այցի ընթացքում հետազոտվել է շուրջ 30 հիվանդ: Նրանք նախատեսում են նաև 3 վիրահատություն:
Այցի ընթացքում Ս. Բաբլոյանը հանդիպել է նաև ԱՀ առողջապահության նախարար Կարինե Աթայանին. նրանք խոսել են Արցախում անհրաժեշտ մասնագետներ ունենալու, նրանց վերապատրաստման, փորձի փոխանակման և այլ հարցերի մասին՝ նշելով, որ նման համագործակցությունը կրելու է շարունակական բնույթ: