Արցախի Ժուռնալիստների միության գրասենյակում տեղի է ունեցել Հայաստանի Հանրապետության առաջին վարչապետ Հովհաննես Քաջազնունու «Ազգ և հայրենիք» գրքի շնորհանդեսը:
Ստեփանակերտում կայացել է «Ազգ և հայրենիք» գրքի շնորհանդեսը
ՍՏԵՓԱՆԱԿԵՐՏ, 22 հուլիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ գրքի խմբագիր, «Սիվիլնեթ» լրատվական կայքի լրագրող, Հայկական ուսումնասիրությունների «ԱՆԻ» կենտրոնի համակարգող Թաթուլ Հակոբյանը միջոցառմանը ողջունելով ներկաներին անդրադարձել է գրքին, որը պատմում է Հովհաննես Քաջազնունու մասին, այնուհետև խոսել «Հայ-թուրքական հարաբերությունները և Ադրբեջանը. 1917-1921 թթ» թեմայով:
Թ. Հակոբյանի խոսքով՝ հայ քաղաքական ու փիլիսոփայական մտքի պատմության այս բացառիկ աշխատությունը՝ «Ազգ և հայրենիք»-ը, առաջին անգամ հատվածաբար տպագրվել է ՀՅԴ «Հայրենիք» ամսագրում՝ 1923-1924 թվականներին ԱՄՆ-ում, բացառությամբ վերջին երկու հատվածների:
«Քաջազնունին հայ քաղաքական մտքի պատմության մեջ բացառիկ տեղ ունի: Նրա այս հատորը շատ ծանոթ չէ Հայաստանի ընթերցողին: Եվ որպես պետական-քաղաքական գործիչ, և որպես գրող, ցավոք, Քաջազնունին ըստ արժանվույն գնահատված չէ ո՛չ Սփյուռքում, ո՛չ Հայաստանում: Վերահրատարակելով նրա աշխատությունները, «ԱՆԻ» կենտրոնն իր համեստ լուման է ներդնում այս խոշոր հային, անհատականությանը ժամանակակիցներին ծանոթացնելու համար»,- ասել է Թաթուլ Հակոբյանը և ավելացրել, որ ինքն իր գործունեությամբ ներկայացնում է չգրված պատմություններ, որին էլ ուղղված է իր գործունեությունը:
Թ. Հակոբյանի խոսքով՝ ինքն աշխատում է նոր գրքի՝ «Հայաստանը 1988 թվականից հետո ժողովրդավարության և ավտորիտարիզմի փակուղում» թեմայով:
«Շատ երկար եմ աշխատում, որովհետև գրում եմ 1988 թվականից մինչև մեր օրերը ներքաղաքական իրավիճակների մասին»,-նշել է Թ. Հակոբյանը:
Պատմաբան, «Կաճառ» գիտական կենտրոնի ղեկավար Մհեր Հարությունյանի խոսքով՝ պատմությունը և պատմագրությունը բավականին բարդ ոլորտ է, և ինքը գտնում է, որ սխալ է այն դատողությունները, որոնք հենվում են մեկ կամ երկու աղբյուրների վրա:
«Ցանկացած դատողություն պետք է հիմնավորված լինի, առնվազն 5 և ավելի աղբյուրների հիման վրա, որպեսզի կարողանանք ճիշտ կարծիք կազմել: Որպես պատմաբան գտնում եմ, որ պետք է պատմական իրադարձությունների մեջ 3 հարցի պատասխանենք՝ ինչո՞ւ, ինչպե՞ս և ի՞նչ: Մենք պետք է համադրենք պատմական փաստերը, վեր հանենք «ինչու»-ները և հետևություններ անենք»,-հավելել է Մ. Հարությունյանը:
Միջոցառմանը ներկաները հանդես են եկել մտքերի փոխանակությամբ և հարց ու պատասխաններով:
