Թուրքիայի արտաքին գործերի նախարար Մևլութ Չավուշօղլուն և ԵՄ հարցերով նախարար Օմեր Չելիքը Բրյուսելում հանդիպել են Եվրոպական միության արտաքին քաղաքականության և անվտանգության հարցերով բարձր ներկայացուցիչ, Եվրոպական հանձնաժողովի փոխնախագահ Ֆեդերիկա Մոգերինիի և Եվրոպական հարևանության քաղաքականության և ընդլայնման բանակցությունների հարցերով ԵՄ հանձնակատար Յոհաննես Հանի հետ:
ԵՄ-ն անհնար է համարում Թուրքիայի հետ նոր գլուխների բացումը
ՍՏԵՓԱՆԱԿԵՐՏ, 26 հուլիսի, ԱՐՑԱԽՊՐԵՍ: Պաշտոնական Անկարայի կողմից առաջարկը ԵՄ հետ նոր գլուխներ բացելու վերաբերյալ չի ընդունվել: Այս մասին հայտնում է գերմանական Deutsche Welle-ն:
Հանդիպման ժամանակ Մոգերինին խիստ մտահոգիչ է անվանել Թուրքիայում ընդդիմադիր գործիչների, լրագրողների, իրավապաշտպանների կալանավորման փաստը: «Ինչպես նախկինում, այնպես էլ այսօր շեշտել ենք, որ անհրաժեշտ է մեր միջև համագործակցությունն ու երկխոսությունը շարունակել իրավական պետության և հիմնարար ազատությունների հարցում դրական քայլեր ձեռնարկելու պարագայում»,- հայտնել է ԵՄ ներկայացուցիչը:
Յոհաննես Հանն էլ ընդգծել է, որ Թուրքիան չի կատարել ներկայացված 72 նախապայմաններից 5-ը: Նա ևս մտահոգություն է հայտնել այդ երկրում իրականացվող անտեղի ձերբակալությունների առնչությամբ: Հանը հիշեցրել է, որ խոսքի և հավաքներ անցկացնելու ազատությունը ժողովրդավարական հասարակության հիմնական սկզբունքներն են: «Այս պահին անհնար է նոր գլուխների բացումը: Մենք խիստ մտահոգ ենք Թուրքիայում կալանավորումների, խոսքի ազատության հարցով»,- նշել է ԵՄ հանձնակատարը:
