ԱՀ Մարտակերտի շրջանի Մատաղիս համայնքում օգոստոսի ութին բացվեց հյուրանոցային համալիր:
Մատաղիսում բացվեց հյուրանոցային համալիր
ՍՏԵՓԱՆԱԿԵՐՏ, 14 օգոստոսի, ԱՐՑԱԽՊՐԵՍ: Հյուրանոցային տուն հիմնելու գաղափարի հեղինակը ռուսաստանաբնակ գործարար Արմեն Ղահրամանյան է, ով իր խոսքում նշեց, որ այն հարմարեցված է տարբեր հնարավորությունների տեր մարդկանց համար:
Արմեն Ղահրամանյանն ընդգծեց, որ ցանկությունը մեծ է եղել հայրենի գյուղում բացել հյուրանոցային համալիր, որտեղ կարող են այցելել մարդիկ, ովքեր գալիս են հանգստի. «ՌԴ-ում ես նույնպես զբաղվում են ռեստորանների, հյուրանոցների ծառայությունների աշխատանքով, ուստի որոշեցի Արցախում ևս ներդրում կատարել»,- նշեց համալիրի հեղինակը:
Նա հավելեց, որ չնայած մեկ տարի առաջ այստեղ պատերազմ էր, սակայն դա չխանգարեց, որպեսզի նոր ծրագիր իրականացվի. « Սա մեր հողն է, ու մենք չպետք է վախենանք որևէ ծրագիր իրագործելուց, քանի որ զինվորը Մատաղիսում կանգնած սահմանն է հսկում, ուստի վտանգի մասին մտածել պետք չէ»,- ավելացրեց Արմեն Ղահրամանյանը: Այս պահին հյուրանոցում կա 5 աշխատակից:
Հյուրանոցային տան հարևանությամբ կա նաև ջրամբար, որտեղ մարդիկ կարող են գալ և հանգստանալ: Համալիրի հեղինակը նշեց, որ նորակառույց շենքում կա երկու քոթեջ (առանձնասենյակ), երեք սենյակ և առանձին հոսթելային սենյակ:
Ջրամբարի հարևանությամբ կառուցված հյուրանոցային համալիրն այցելուներին հնարավորություն է տալիս կազմակերպել ակտիվ հանգիստ: Այստեղ մարդիկ կարող են օգտվել ժամանցի համար նախատեսված ծառայություններից՝ թենիսի, բիլիարդի խաղերից, մոտորանավակի ջրային ծառայությունից:
Հյուրանոցային համալիրի տնօրենը նաև նշեց, որ մատաղիսցիները ևս գոհ են հանգստի գոտուց, քանի որ Արցախի մյուս շրջաններից այցելուներ են գալիս, ու նրանց թիվը օրեցօր ավելանում է: Հանգստի գոտին գործելու է տարվա բոլոր եղանակներին:
Վերջում Ա. Ղահրամանյանը հավելեց, որ ներդրումները Մատաղիսում շարունակվելու են:
