Օգոստոսի 11-ին Մարտունու շրջանի Նորշեն գյուղում տեղի ունեցավ Թուֆենկյան հիմնադրամի կողմից վերանորոգված ազատամարտիկ Կամո Դավթյանի բնակարանամուտը:
Թուֆենկյան հիմնադրամի ջանքերով վերանորոգվեց ազատամարտիկ Կամո Դավթյանի բնակարանը
ՍՏԵՓԱՆԱԿԵՐՏ, 14 օգոստոսի, ԱՐՑԱԽՊՐԵՍ: 51-ամյա Կամո Դավթյանի խոսքով մինչև ծրագրում ընդգրկվելը տունն այդքան էլ բարվոք վիճակում չէր, քանի որ բացակայում էին կենցաղային պայմանները:
Երեք երեխաների հայրն նշել է, որ շինարարական աշխատանքները սկսվել էին ընթացիկ տարվա մայիսի 4-ին և ավարտվել օգոստոսի 8-ին:
Ազատամարտիկը վիրավորվել է 1994 թվականի ապրիլի 12-ին և ունի երրորդ կարգի հաշմանդամություն:
Իսկ Կ. Դավթյանի կինը՝ Գոհարը, նշեց, որ մինչև շինարարությունը սկսելը սանհանգույցի և խոհանոցի տարրական պայմանները բացակայում էին, սակայն հիմա ամեն ինչ կա. «Շատ ուրախ ենք, որ այսպիսի բարեգործ աշխատանք են կատարել մեզ համար: Հիմա ունենք խոհանոց, բաղնիք, զուգարան, մշտական ջուր»,- ավելացրել է նա և իր, շնորհակալությունը հայտնել Թուֆենկյան հիմնադրամին:
Թուֆենկյան հիմնադրամի գործադիր տնօրեն Րաֆֆի Դուդակլյանն էլ նշել է , որ «Վիրավոր զինվորների բնակարանային ապահովման» ծրագիրը գործում է 2016 թվականի ապրիլից հետո, երբ առաջին անգամ կազմակերպվեց դրամահավաք, որին միացան նաև անհատ բարերարներ. « Ծրագիրն ի սկզբանե նախատեսված էր միայն ապրիլյան պատերազմում վիրավորում ստացած զինվորների համար: Սակայն հետո ավելացրինք նաև 1990-ն թվականներին վիրավորում ստացած ազատամարտիկներին, որոնք բնակարանային խնդիր ունեն »,- ավելացրեց Ր. Դուդակլյանը և ընդգծեց, որ Կամոն թվով երկրորդն է նրանցից:
Ծրագիրը շարունակական կլինի: Առաջիկայում սպասվում է բնակարանամուտ Ստեփանակերտում և Ասկերանի շրջանի Պատարա գյուղում: