Ռուսաստանաբնակ բարերար, «Լուդինգ» ընկերության նախագահ Արթուր Վարժապետյանը հերթական անգամ Արցախի Հանրապետության Շահումյանի, Հադրութի, Ասկերանի, Շուշիի, Քաշաթաղի շրջաններին և ԱՀ մի շարք պետական կառույցներին է նվիրաբերել մարդատար և շտապօգնության «Շևրոլետ» և «ՈւԱԶ» մակնիշի ընդհանուր առմամբ 20 ավտոմեքենաներ, որոնց բանալիները բարերարն այսօր հասցեատերերին է հանձնել Ստեփանակերտի Վերածննդի հրապարակում:
Արթուր Վարժապետյանը ավտոմեքենաների հերթական խմբաքանակն է նվիրել Արցախին (լուսանկարներ)
ՍՏԵՓԱՆԱԿԵՐՏ, 5 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Արթուր Վարժապետյանն ասել է, որ արդեն 10-րդ տարին է, անընդմեջ ինքը սեպտեմբերի 5-ին Արցախի կարիքների համար մեքենաներ է նվիրում:
«Այս նվիրատվությունն ինձ համար ավանդույթի է վերածվել: Ես այս քայլով փորձում եմ օգտակար լինել արցախցիներին, և դա ինձ համար հաճելի է ու պատվաբեր»,- նշել է Ա. Վարժապետյանը:
Քաշաթաղի շրջանի Կովսկանի տեղամասային հիվանդանոցի գլխավոր բժիշկ Լուսինե Սարգսյանը, հաստատության համար ստանալով «ՈՒԱԶ» մակնիշի մեքենա, մասնավորապես նշել է. «Ուզում եմ խորին շնորհակալություն հայտնել բարերարին, քանի որ այն մեր տարածաշրջանի համար, իրոք, անհրաժեշտություն էր: Համոզված եմ՝ այն մեր աշխատանքը շատ ավելի արդյունավետ կդարձնի, քանի որ հնարավորություն կունենանք նաև արձագանքել հիվանդների շտապ օգնության կանչերին»:
Հանդիսավոր միջոցառմանը ներկա էին ԱՀ նախագահ Բակո Սահակյանը, ԱՀ վարչապետ Արայիկ Հարությունյանը, ԱԺ նախագահ Աշոտ Ղուլյանը, պաշտոնական այլ անձինք, քաղաքացիներ: