Արցախում, այսօր՝ սեպտեմբերի 7-ին, տեղի կունենա Արցախի Հանրապետության անցումային փուլի համար ընտրված նախագահ Բակո Սահակյանի երդմնակալության արարողությունը:
Այսօր տեղի կունենա Բակո Սահակյանի երդմնակալության արարողությունը
ՍՏԵՓԱՆԱԿԵՐՏ, 7 սեպտեմբերի, ԱՐՑԱԽՊՐԵՍ: Նշենք, որ պաշտոնի ստանձնման օրվանից սկսած՝ 20 օրվա ընթացքում, նորընտիր նախագահը պետք է ձեւավորի կառավարություն եւ հայտարարի կառավարության կազմը՝ ի տարբերության նախորդ հետընտրական զարգացումների, երբ խորհրդարանը մասնակցում էր կառավարության ձեւավորմանը:
Կառավարության կազմավորումից հետո եւս 20-օրյա ժամկետում նորընտիր նախագահը հրապարակում է կառավարության գործնեության ծրագիրը:
Արցախում սահմանադրական փոփոխությունների անցումային դրույթներով պայմանավորված ԱԺ-ի կողմից ընտրված նախագահը կպաշտոնավարի մինչեւ գործող Ազգային ժողովի լիազորությունների ավարտը՝ 2020 թվականը, որից հետո արդեն տեղի կունենան Արցախի նախագահի համապետական ընտրություններ:
Նշենք, որ Նոր Սահմանադրությամբ կառավարությունը ղեկավարելու է նախագահը:
«Առաջիկա երեք տարում սպասվում է շատ լուրջ աշխատանք՝ համակարգը հարմարեցնելու, ադապտացնելու սահմանարդությամբ ձևավորված նոր կառավարման համակարգին: Դրա տակ պետական համակարգի բոլոր թևերը իրենց անելիքներն ունեն», - հայտարարել է Արցախի ԱԺ նախագահ Աշոտ Ղուլյանը: Նրա խոսքով, երեք տարիների ընթացքում 80-ից ավելի օրենքներ են կամ ընդունելու, կամ եղած օրենքներում փոփոխություններ կատարելու. «Դրանց նպատակն է լինելու գործող կառուցակարգերը բարեփոխելը»:
Հիշեցնենք, որ հուլիսի 19-ին Արցախի ԱԺ-ն երկրի նախագահ է ընտրել Բակո Սահակյանին: Նա, փաստորեն, երրորդ անգամ է զբաղեցնում երկրի նախագահի պաշտոնը:
