Հադրութ քաղաքում սեպտեմբերին բացվել է «Դորութ Ստուդիո» ճարտարապետական ընկերությունը:
Նորաբաց ճարտարապետական ընկերությունը կզբաղվի Հադրութի քաղաքաշինական զարգացման ծրագրերով
ՍՏԵՓԱՆԱԿԵՐՏ, 8 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում ընկերության հիմնադիր տնօրեն Նինա Ներսեսյանն ասել է, որ ընկերության բացման հիմնական նպատակն է Հադրութ քաղաքի քաղաքային կենսապատկերի, ինչպես նաև համանուն շրջանի այլ բնակավայրերի կայուն քաղաքաշինական զարգացումը՝ հիմքում դնելով թե՛ իր հիմնած կազմակերպության աշխատակիցների ակտիվությունը և թե՛ հետագա համագործակցությունը արտերկրի առաջադեմ կազմակերպությունների հետ:
«Հադրութի քաղաքային զարգացումը կատարվել է մի քանի փուլերով, և դրանցից անհրաժեշտ է հստակ տարբերակել 19-րդ դարի ցարական շրջանի ճարտարապետությունը, խորհրդայինը և ժամանակակիցը։ Սրանք երեք ամբողջովին տարբեր շրջաններ են, որոնք իրենց մեջ ամփոփում են ժամանակաշրջաններին բնորոշ ճարտարապետական լուծումները և դրանք անպայման պետք է հաշվի առնվեն մեր աշխատանքներում»,- ասել է Ն. Ներսեսյանը:
Մեր զրուցակցի խոսքով՝ ավարտելով Ճարտարապետության և շինարարության Հայաստանի ազգային համալսարանը ուսումը շարունակել է Իտալիայի Միլան քաղաքի Պոլիտեխնիկական համալսարանում։ «Ընկերություն բացելու գաղափարը ինձ մոտ ծագել է մագիստրոսական թեզն ուսումնասիրելիս, որը վերաբերում էր Հադրութ քաղաքի հին թաղամասի վերակառուցմանը»,- ասել է արմատներով հադրութեցի երիտասարդ ճարտարապետը և հավելել, որ անգամ կազմակերպության անունն ընտրելիս հաշվի է առել Հադրութ քաղաքի աշխարհագրական դիրքը: Դորութ արտահայտությունը պարսկերենից թարգմանվում է՝ որպես միջագետք: Իսկ Հադրութ քաղաքը գտնվելով երկու գետերի արանքում, ըստ Ն. Ներսեսյանի, հենց միջագետք է հիշեցնում:
