Շուշիում այսօր տեղի է ունեցել բարերարներ Սերգեյ Սարգսյանի և Մարատ Հակոբջանյանի միջոցներով կառուցված ստեղծագործական կենտրոնի քառահարկ շենքի բացման հանդիսավոր արարողություն:
Շուշիում բացվել է նորակառույց ստեղծագործական կենտրոն (լուսանկարներ)
ՍՏԵՓԱՆԱԿԵՐՏ, 8 սեպտեմբերի, ԱՐՑԱԽՊՐԵՍ: Ըստ «Արցախպրես»-ի թղթակցի հաղորդման՝ միջոցառմանը բացման խոսքով հանդես է եկել Շուշիի շրջվարչակազմի աշխատակազմի կրթության և սպորտի բաժնի վարիչ Իրինա Սարգսյանը:
«Մատաղ սերնդի լուսավոր ապագային ուղղված ամեն մի քայլ ամենաշահեկան և աստվածագհաճո գործերից է: Կիրթ հասարակություն ունենալը գլխավոր նախապայման է երկրի զարգացման, հզորացման և մեծ հաղթանակների համար: Շուշիի ստեղծագործական կենտրոնի առանձին շենքային պայմաններ ունենալու երազանքն այսօր իրականություն դարձավ. վերանորոգված և վերականգնված կրթամշակութային օջախները հնարավորություն են ընձեռում Արցախի տաղանդավոր երեխաների ունակությունների զարգացմանը՝ դրանով իսկ նպաստելով, որ վերականգնվի Շուշիի մշակութային փառավոր անցյալը»,-մասնավորապես ասել է Ի. Սարգսյանը:
Շուշիի ստեղծագործական կենտրոնի տնօրեն Գոհար Մարգարյանը հայտնել է, որ կենտրոնը գործում է 1995 թվականից, սակայն առանց մշտական վայր ունենալու: «Վերջին 5 տարիներին զբաղեցնում էինք Շուշիի Խաչատուր Աբովյանի անվան դպրոցի առանձին մասնաշենքում. մեզ էր տրամադրված միայն 5 սենյակ, որոնցից 3-ն օգտագործում էինք 23 խմբակների աշխատանքները կազմակերպելու համար: Չնայած այն հանգամանքին, որ կենտրոնը դժվարին ճանապարհ է անցել, սակայն այն կանոնավոր կերպով գործել էր: Մասնակցել ենք բազմաթիվ մրցույթների, փառատոնների, ցուցահանդեսների, ազգային-ավանդական տոների: Այսօր արդեն ունենք նորակառույց, ժամանակակից պայմաններով տիպային շենք, որտեղ գործում եմ երգեցողության, պարարվեստի, նկարչության, գոբելենի, հմուտ ձեռքերի, մակրամեի, ասեղնագործության, փափուկ խաղալիքների պատրաստման և այլ խմբակներ:
Տարիներ շարունակ մեր կենտրոն հաճախած 230 սաներից ավել երեխաներ մենք հնարավորություն չենք ունեցել խմբակներում ընդգրկելու: Այս նորակառույց շենքը հնարավորություն կտա լրացնելու այդ բացը, կավելացնենք նաև կարպետագործության, կոլաժի, գորգարվեստի և այլ նոր խմբակներ. այդպիսով, կավելանա նաև սաների թիվը՝ հասնելով մինչև 450-ի»,-մանրամասնել է Գ. Մարգարյանը:
Ստեղծագործական կենտրոնի տնօրենը բարերարների որդիներին Կարո Սարգսյանին և Արայիկ Հակոբջանյանին է նվիրել իրենց սաների ձեռքերով պատրաստած աշխատանքներ:
Շուշիի քաղաքապետ Արծվիկ Սարգսյանն էլ իր խոսքում տեղեկացրել է, որ Շուշի քաղաքապետարանի ավագանու որոշմամբ քաղաքի սոցիալ-մշակութային կյանքում ներդրած ծանրակշիռ ավանդի համար Կարո Ալավերդիի Սարգսյանին շնորհվել է Շուշի քաղաքի պատվավոր քաղաքացու կոչում:
Արցախի թեմի առաջնորդ Պարգև արքեպիսկոպոս Մարտիրոսյանը, օրհնության կարգ կատարելուց հետո, իր խոսքում մասնավորապես ասել է. «Մեր երեխաներն իրենց ասմունքով, երգով կարծես նոր շունչ հաղորդեցին ներկաներիս: Մենք շնորհակալ ենք և՛ Արցախի իշխանությանը և՛ մեր բարերարներին, նրանց, ովքեր կապված են հայրենի հողին, իրենց արմատին, և մեր երազանքները նրանք աստիճանաբար կյանքի են կոչում: Սա էլ նվաճում է, սա էլ մի բարձունք է, որ հաղթահարում ենք: Շուշին օրեցօր վերադարձնում է իր նախկին հմայքին, փայլին. այն նոր և հզոր մշակույթի կենտրոն է դառնալու»:
Բարերար, Շուշիի պատվավոր քաղաքացի Կ. Սարգսյանը մեզ հետ զրույցում նշել է.
«Ես շատ շնորհակալ եմ ճակատագրին, որ ինձ տվել է նման հնարավորություն, որ կարողանամ որևէ օգտակար գործ կատարել իմ հայրենիքի համար:
Շատ ուրախ եմ, որ շուշեցի երեխաներին հնարավորություն է ընձեռվել սովորելու նոր ստեղծագործական կենտրոնում»:
Միջոցառմանը բարերարին իր գոհունակությունն ու շնորհակալությունն է հայտնել նաև Սարգսյանների ընտանիքի լավագույն բարեկամ, Արցախում հայրենանվեր գործողություններ իրականացնող Գուրգեն Մելիքյանը:
Միջոցառմանը կենտրոնի սաները հանդես են եկել հայրենասիրական երգերով, պարերով և ասմունքով, հնչել է նաև արցախյան բարբառով ողջույնի խոսքեր:
Շուշիի ստեղծագործական կենտրոնի նորակառույց շենքի բացման պատիվը տրվել է բարերաների հարազատներին:
Հետո ներկաները շրջել ու ծանոթացել են շենքային պայմաններին՝ դիտել կենտրոնի սաների աշխատանքները:
Միջոցառմանը ներկա էին ԱՀ նախագահ Բակո Սահակյանը, ԱՀ վարչապետ Արայիկ Հարությունյանը, ԱԺ նախագահ Աշոտ Ղուլյանը, պաշտոնատար այլ անձինք, հյուրեր արտերկրից, շուշեցիներ և այլք: