Գերմանիայի կանցլեր Անգելա Մերկելը տեղեկացրել է, որ Թուրքիայի հետ տնտեսական հարաբերությունները սահմանափակվել են, իսկ անհրաժեշտության դեպքում այդ երկրի նկատմամբ տնտեսական ճնշումները կարող են ավելի խստացվել:
Մերկել. «Հարկ եղած դեպքում կխստացնենք տնտեսական ճնշումները Թուրքիայի վրա»
ՍՏԵՓԱՆԱԿԵՐՏ, 22 սեպտեմբերի, ԱՐՑԱԽՊՐԵՍ: «Էրմենիհաբեր»-ի փոխանցմամբ, այս մասին Մերկելը հայտարարել է Թուրքիայում ազատազրկված Գերմանիայի քաղաքացիների խնդրի համատեքստում:
«Առանց այդ էլ Թուրքիայի հետ տնտեսական հարաբերությունները արդեն որոշ ժամանակ է՝ սահմանափակվել են: Եվ եթե դրա անհրաժեշտությունը լինի, թեև ես դա չեմ ցանկանում, մենք կշարունակենք նույն կերպ», - ասել է Գերմանիայի կանցլերը:
Նա հավելել է նաև, որ Գերմանիան շարունակում է անհրաժեշտ քայլեր ձեռնարկել՝ Թուրքիայում կալանավորված իր քաղաքացիների ազատ արձակմանը հասնելու համար:
Մերկելը նաև կրկնել է Թուրքիայի նախագահ Ռեջեփ Թայիփ Էրդողանին ուղղված քննադատությունները՝ նշելով, որ Թուրքիան հեռանում է իրավական պետության մասին իրենց պատկերացումներից:
Սեպտեմբերի 24-ին Գերմանիայում անցկացվելու են խորհրդարանական ընտրություններ: Այդ ընտրությունների արդյունքները Թուրքիայի համար ամեն դեպքում բարենպաստ չեն լինի, քանի որ դաշնային խորհրդարան մտնելու համար պայքարող բոլոր քաղաքական կուսակցություններն էլ կողմ են արտահայտվել Թուրքիայի նկատմամբ տարվող քաղաքականության խստացմանը: