Այսօր՝ սեպտեմբերի 23-ին, Ստեփանակերտի Ստեփան Շահումյանի անվան հանրապետական մարզադաշտում տեղի է ունեցել զանգվածային լրատվամիջոցների մինի ֆուտբոլի միջազգային մրցաշար:
Ստեփանակերտում կայացած ֆուտբոլի միջազգային մրցաշարում հաղթել է Արցախի թիմը
ՍՏԵՓԱՆԱԿԵՐՏ, 23 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ մրցաշարին մասնակցել են վեց թիմեր՝ Ստեփանակերտից, Երևանից, Ախալքալաքից, Օդեսայից, Բրյանսկից և Վոլգոգրադից:
Միջոցառմանը ներկա ԱՀ նախագահ Բակո Սահակյանը կարեւորել է նման միջոցառումների անցկացումն Արցախում՝ նշելով, որ դրանք նպաստում են եւ սպորտի մասսայականացմանը, եւ Արցախի ու տարբեր երկրների լրագրողների միջեւ գործնական եւ մարդկային կապերի հաստատմանն ու ամրապնդմանը:
ԱՀ կրթության, գիտության և սպորտի նախարարի պաշտոնակատար Սլավա Ասրյանն ասել է, որ սա կենսական պահանջ է, և որ այսպիսի մրցաշարերի կազմակերպումը պետք է դարձնել ավանդական: «Ֆուտբոլը ստեփանակերտցիների ավանդաբար սիրած մարզաձևերից է, և պատահական չէ, որ խորհրդային տարիներին Արցախի հավաքականը ուժեղագույններից մեկն է եղել: Այսօր, կարծում եմ, ժամանակն է վերականգնելու լավագույն ավանդույթները, հատկապես, որ ունենք ժամանակակաից չափանիշներին համապատասխանող մարզադաշտ»,- ասել է Ս. Ասրյանը:
Իսկ ԱՀ կրթության, գիտության և սպորտի նախարարության աշխատակազմի սպորտի վարչության պետ Աշոտ Դանիելյանը նշել է, որ մրցաշարը նվիրված է Ստեփանակերտ քաղաքի 94-րդ տարեդարձին: «Վերջին տարիներին արցախցի մարզիկները մեծ հաջողություններ են ունեցել՝ բազմաթիվ մրցանակային տեղեր զբաղեցնելով միջազգային կարգի տարբեր մրցույթներում: Արցախը համաշխարհային սպորտի լիարժեք մաս է կազմում և ոչինչ չի կարող խոչընդոտել Արցախում ևս միջազգային կարգի մրցաշարարի անցկացմանը»,- ասել է Ա. Դանիելյանը:
Իսկ Արտասահմանյան թղթակիցների ասոցիացիայի նախագահ, Հայստանի լրագրողների հավաքականի ավագ Տիգրան Հովհաննիսյանը նշել է, որ նախաձեռնության հեղինակը Արտասահմանյան թղթակիցների ասոցիացիան է: Իսկ ծրագիրն իրականացվել է ՀՀ նախագահի աշխատակազմի հովանու ներքո, Հայաստանի Երիտասարդական հիմնադրամի գրանտային ծրագրի շրջանակներում, ինչպես նաև ԱՀ նախագահ Բակո Սահակյանի և կառավարության աջակցությամբ:
Տ. Հովհաննիսյանն ավելացրել է որ լրագրողների մասնակցությունը նմանատիպ մրցաշարերի շատ կարևոր է, քանի որ սպորտը նախ և առաջ առողջ ապրելակերպ է, և լրագրողները պետք է բոլոր ոլորտներում էլ լինեն:
Ֆուտբոլային մրցաշարին թիմերը հանդես են եկել խմբային խաղերով:
Մրցաշարի վերջին փուլում Արցախի հանրային հեռուստատեսության թիմը, 4-2 հաշվով հաղթելով ՀՀ թիմին, ընդհանուր միավորներով զբաղեցրել է մրցաշարային առաջին տեղը:
Միջոցառմանը ներկա էր Արցախի թեմի առաջնորդ Պարգև արքեպիսկոպոս Մարտիրոսյանը, պաշտոնատար այլ անձինք և հյուրեր: