Կիրակի՝ սեպտեմբերի 24-ին, Գերմանիայում անցկացվում էին խորհրդարանի՝ Բունդեսթագի ընտրությոնները: Կանխատեսումների համաձայն՝ էքսիթ-փոլերի տվյալներով Բունդեսթագի ընտրություններում առաջատարը քրիստոնեադեմոկրատական՝ Քրիստոնեադեմոկրատական միություն/Քրիստոնեասոցիալական միություն կուսակցությունների դաշինքն է, որի ընտրական ցուցակը ղեկավարում է կանցլեր Անգելա Մերկելը, փոխանցում է DW-ն:
Ընտրություններ՝ Գերմանիայում. Առաջատարը Մերկելի կուսակցությունն է
ՍՏԵՓԱՆԱԿԵՐՏ, 24 սեպտեմբերի, ԱՐՑԱԽՊՐԵՍ։ Infratest Dimap ինստիտուտի տվյալներով, որն էքսիթ-փոլ եւ վերլուծություն է կատարել ARD հեռուստաալիքի պատվերով, ՔԴՄ/ՔՍՄ դաշինքին այս պահին ձայն է տվել ընտրողների 32,5 տոկոսը: 2013 թվականի ընտրութուններին դաշինքը ստացել էր 41,5 տոկոս:
Կառավարության կոալիցիայում ՔԴՄ/ՔՍՄ-ի ներկայիս գործընկեր սոցիալ-դեմոկրատներին նախապատվություն է տվել հարցմանը մասնակցած ընտրողների 20 տոկոսը (2013-ին՝ 25,7 տոկոս):
Առաջին անգամ երրորդ տեղ է դուրս եկել աջ պոպուլիստական «Այլընտրանք Գերմանիայի համար» կուսակցությունը՝ ձայների 13,5 տոկոսով: Հաջորդում են՝ Ձախերի կուսակցությունը՝ 9 տոկոս (2013-ին՝ 8,6 տոկոս), լիբերալ Ազատ դեմոկրատական կուսակցությունը՝ 10,5 տոկոս, որը կարող է խորհրդարան վերադառնալ, եւ «Միություն-90»/«կանաչներ» կուսակցությունը՝ 9,5 տոկոս (8,4): Կանխատեսումների համաձայն՝ մնացած կուսակցությունները խորհրդարան անցնելու համար անհրաժեշտ 5 տոկոսից քիչ են ստացել:
Տեսականորեն կուսակցություններից որոնք կկարողանան Գերմանիայի նոր կառավարությունը կազմավորել՝ պարզ կլինի միայն ընտրությունների նախնական պաշտոնական արդյունքների հրապարակումից հետո: Սպասվում է, որ դրանք կհրապարակվեն երկուշաբթի գիշերը: Գերմանիայի խորհրդարանում իրենց թեկնածուներն էին առաջադրել Գերմանիայի 42 քաղաքական կուսակցություններ:
Ընտրություններին մասնակցությունը 75 տոկոս է կազմել, նախորդ ընտրություններին քվեարկությանը մասնակցել է ընտրողների 71,5 տոկոսը:
