Սեպտեմբերի 24-ին Գերմանիայում կայացած խորհրդարանական ընտրությունների արդյունքում ծագումով թուրք 14 թեկնածու անցել է խորհրդարան:
Բունդեսթագի նորընտիր պատգամավորներից 14-ը թուրքական ծագում ունեն
ՍՏԵՓԱՆԱԿԵՐՏ, 25 սեպտեմբերի, ԱՐՑԱԽՊՐԵՍ: «Էրմենիհաբեր»-ի փոխանցմամբ, քվեների 20.5 տոկոսով Բունդեսթագ անցած Սոցիալ-դեմոկրատական կուսակցության (SPD) կողմից պատգամավոր են դարձել թուրք թեկնածուներ Այդան Օզօղուզը, Մեթին Հաքվերդին, Մահմութ Օզդեմիրը, Ջանսել Քըզըլթեփեն, Գյուլիստան Յուքսելը, Էլվան Քորքմազը:
Ձայների 8.9 տոկոսը ստացած Կանաչների կուսակցությունից (Die Grüne) պատգամավոր են ընտրվել Ջեմ Օզդեմիրը, Դանյալ Բեյազը, Էքին Դելիգյոզը, Ջանան Բայրամը, Ֆիլիզ Փոլաթը:
Ձախերի կուսակցությունից (Die Linke) պատգամավոր են դարձել Էվրիմ Զոմմերը, Սևիմ Դաղդելենը և Գյոքայ Աքբուլութը:
Նախորդ՝ 2013թ. խորհրդարանական ընտրություններում Բունդեսթագի պատգամավոր էր դարձել թուրքական ծագմամբ 11 թեկնածու:
Նախորդ ընտրություններում հաղթանակ տարած Օզջան Մութլու (Dile Linke) և Ջեմիլե Յուսուֆը (CDU) այս անգամ բավարար ձայներ չեն ստացել: Ընտրություններում ընդհանուր առմամբ մասնակցում էր 92 թուրք թեկնածու:
Գերմանիայում թուրքերի կողմից հիմնված Գերմանական դեմոկրատական միություն (ADD) կուսակցությունը ընտրություններին մասնակցել է միայն Հյուսիսային Ռեն -Վեսթֆալիա նահանգում: Կուսակցությունը ստացել է 41.178 քվե:
Ընտրություններում հաղթանակ է տարել կանցլեր Անգելա Մերկելի գլխավորած Քրիստոնեա-դեմոկրատական միություն/Քրիստոնեա-սոցիալական միություն կուսակցությունների դաշինք (CDU/CSU), որը նախնական պաշտոնական տվյալների համաձայն ստացել է քվեների 33 տոկոսը:
