«Մասիս Տոբակո» ընկերության Մարտունու տեղամասում ծխախոտի տերևների մթերման հիմնական աշխատանքներն ընթացքի մեջ են:
Մարտունու տեղամասում ծխախոտի տերևների մթերման հիմնական աշխատանքներն ընթացքի մեջ են
ՍՏԵՓԱՆԱԿԵՐՏ, 26 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում «Մասիս Տոբակո» ընկերության Մարտունու տեղամասի տեխնոլոգ Աշոտ Մխիթարյանն ասել է, որ մթերման աշխատանքները սկսվել են հուլիսի 24-ին, և այս պահի դրությամբ ընդունվել է 350 տոննա ծխախոտի տերև:
«Ծխախոտի տերևների ընդունման գործընթացը շարունակվելու է մինչև դեկտեմբեր, իսկ առայժմ չորանոցում տեղի է ունենում հակավորում (տեսակավորում) և չորացած տերևների տեղափոխում գործարան: Այս տարի շրջանում մշակվել է 78 հա ցանքատարածություն: Հիմնական մշակությունն իրականացնում են անհատ ծխախոտագործներ, որոնց հետ դեռևս գարնանը նախօրոք կնքվել է պայմանագիր»,- ասել է Ա. Մխիթարյանը և ավելացրել, որ ծխախոտի մեկ կիլոգրամի գինը սահմանվել է 90 դրամ, ևս 10 դրամ ծխախոտագործին վճարում է կառավարությունը:
«Մինչև ծխախոտի տերևները չորանոց տեղափոխելը, աշխատանքն իրականացվում է մի քանի փուլերով: Նախապատրաստական աշխատանքներից հետո կատարվում է սածիլում, որը սկսվում է մայիսին և տևում մոտ մեկ ամիս, ապա՝ բույսի հիմնական մշակություն. այդ գործընթացը շարունակվում է մինչև տերևների հասունանալը»,- ասել է Ա. Մխիթարյանը և ավելացրել, որ ներկայումս աճեցվում է միայն ծխախոտի «Վերջինյա» տեսակը, իսկ Արցախում եղանակային պայմանները բարենպաստ են ծխախոտի աճեցման համար:
Ներկայումս Մարտունու տեղամասի չորանոցում կա 42 աշխատող, որոնցից հիմնական են միայն 12-ը: Ա. Մխիթարյանը նշել է, որ կանանց համար նախատեսված է 80, իսկ տղամարդկանց համար՝ 85 հազար դրամ աշխատավարձ: Սահմանված ժամաքանակից դուրս աշխատելու դեպքում՝ տրամադրվում է նաև հավելավճար: Սակայն, ըստ մեր զրուցակցի, մթերման սեզոնին աշխատուժի խնդիր կա:
«Բացի Մարտունու բնակիչներից, աշխատողներ կան նաև շրջանի Գիշի, Խնուշինակ և Ճարտար համայնքներից: Նրանք նախատեսված տրանսպորտով ամեն օր գալիս են աշխատանքի»,- ասել է Ա. Մխիթարյանը:
Ընկերության Մարտունու տեղամասի կոորդինատոր Սլավիկ Հայրապետյանը նշել է, որ այս պահին դաշտերում ընթացող աշխատանքների ընթացքը կարելի է գնահատել բավարար, քանի որ մթերումն իրականացվում է նախատեսված ժամանակացույցի համաձայն:
Նա, ներկայացնելով անհատ ծխախոտագործ Ալյոշա Հայրապետյանին, նշել է, որ այս տարի վերջինս մշակել է 7 հա ցանքատարածություն: «Մեկ հա-ի չափով ստացվում է 25 տոննա բերք:
Եվ սա դրական ցուցանիշ է տարածաշրջանի համար»,- ասել է Ս. Հայրապետյանը և ավելացրել, որ անհատ ծխախոտագործը, տարիներ ի վեր, զբաղվում է ծխախոտի մշակմամբ և այսօր վարպետացել է այդ աշխատանքում:
