Այսօր՝ հոկտեմբերի 8-ին, Արցախում նշվող Գյուղատնտեսության աշխատողի մասնագիտական օրվա կապակցությամբ, Ստեփանակերտի Վերածննդի հրապարակում կազմակերպվել է ավանդական դարձած «Բերքի տոնը»:
Ստեփանակերտի Վերածննդի հրապարակը մեծ տոնավաճառի է վերածվել. Արցախում նշվում է «Բերքի տոնը» (լուսանկարներ)
ՍՏԵՓԱՆԱԿԵՐՏ, 8 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` ԱՀ գյուղատնտեսության նախարարության նախաձեռնությամբ Ստեփանակերտի Վերածննդի հրապարակում վաղ առավոտյան սկսվել է արցախյան գյուղատնտեսական մթերքների և արտադրատեսակների նմուշների ցուցահանդես-տոնավաճառ:
Հանրապետության բոլոր տնտեսվարողներին և անհատներին հնարավորություն է ընձեռվել ցուցադրելու և վաճառելու իրենց արտադրած գյուղմթերքը: Տոնավաճառում ներկայացված բերք ու բարիքն օրհնել է Հայ Առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը:
Այնուհետև, ԱՀ նախագահ Բակո Սահակյանի գլխավորությամբ, պաշտոնական պատվիրակությունը շրջել է տոնավաճառի տաղավարներով՝ ծանոթացել վաճառքի հանված գյուղմթերքներին և արտադրատեսակներին։
ԱՀ գյուղատնտեսության նախարար Ժիրայր Միրզոյանը մեզ հետ զրույցում ասել է, որ արդեն յոթերորդ տարին է, ինչ Արցախում մեծ շուքով կազմակերպվում է «Բերքի տոնը» և այս տարվա առանձնահատկությունն այն է, որ ավելացել է մասնակիցների թիվը: «Նախորդ տարվա համեմատ՝ այս տարի շուրջ 250 նոր տաղավար է ավելացվել: Տոնավաճառին՝ Արցախի բոլոր շրջանների 167 համայնքներից մասնակցում են շուրջ 1000 դիմորդներ, հատկապես, հաճելի է տեսնել Թալիշի տաղավարը»,- մասնավորապես ասել է Ժ. Միրզոյանը:
Խոսելով տոնավաճառին ներկայացրած ապրանքների գներից՝ գյուղնախարարն ասել է, որ բոլոր մասնակիցներին նախօրոք զգուշացված էր, որպեսզի վաճառքն իրականացվի շուկայականից 15-20 տոկոս ցածր գնով, քանի որ ԱՀ գյուղնախարարությունը հոգացել է հայտատուների ճանապարհածախսը, ինչպես նաև հատկացրել է առանձին տաղավարներ:
Քաշաթաղի շրջվարչակազմի ղեկավարի տեղակալ Արտուշ Մխիթարյանն ասել է, որ իրենց շրջանից մասնակցում է շուրջ 500 մեքենա: «Տոնավաճառին ներկայացրել ենք 60-ից ավելի ապրանքատեսակներ: Քանի որ մեր շրջանում տարբեր ազգերի ներկայացուցիչներ են ապրում, փորձել ենք այս տարի հետաքրքրություն մտցնել՝ ներկայացնելով հնդկական, սիրիական, լիբանանյան, ասորական, ռուսական խոհանոցներ՝ համապատասխան ազգերի ներկայացուցիչների մասնակցությամբ»,- նշել է Ա. Մխիթարյանը:
Թալիշի «ԹԱՐԻՆՋ» գյուղատնտեսական արտադրական կոլեկտիվ տնտեսությունը հանդես գալով առանձին տաղավարով սպառողներին է ներկայացրել համայնքի բերք ու բարիքից պատրաստված ապրանքատեսակներ՝ դոշաբ, օղի, մուրաբա, հյութեր: Կոլեկտիվ տնտեսության ղեկավար Լևոն Ապրեսյանի խոսքով՝ տնտեսությունը ստեղծվել է 2017 թվականին: «Էկոլոգիապես մաքուր արտադրանք ներկայոցնող «ԹԱՐԻՆՋ»-ի նպատակը կատարած աշխատանքի շնորհիվ բնակիչներին հայրենի Թալիշում կրկին համախմբելն է: Նույնիսկ ապրիլյան պատերազմը չխոչընդոտեց որպեսզի թալիշցիներն ավելի միավորվեն, աշխատեն, վերամշակեն իրենց հայրենի բնօրրանի տված բերք ու բարիքը: Որպես առաջին կոլեկտիվ տնտեսություն, որն ունի շուրջ 20 աշխատող, նպատակ ունենք հետագայում, շնորհիվ թալիշցիների աշխատասիրության, զարգացնելու և հզորացնելու համայնքը և հասնելու Թալիշի նախկին հզոր փառքին»,- ասել է Լ. Ապրեսյանը:
Իսկ Մարտունու քաղաքապետ Մհեր Խաչատրյանն էլ ասել է, որ իրենց տաղավարում բացի գյուղատնտեսական բարիքներից, ներկայացրել են նաև շրջանում գործող գործարանների արտադրությունը՝ մասնավորապես ալկոհոլային խմիչքներ՝ տարբեր տեսակի գինիներ և օղիներ: «Տոնավաճառին այս տարի փորձել ենք ավելի ճոխ և գրավիչ ձևով ներկայանալ՝ ուշադրություն դարձնելով տաղավարի դիզայնին և ներկայացվող ապրանքատեսակներին: Ներկայացնում ենք նաև Մարտունու մանկապատանեկան ստեղծագործական կենտրոնի սաների ձեռքի աշխատանքները, որն էլ յուրովի է շունչ հաղորդում մեր տաղավարին»,- նշել է Մ. Խաչատրյանը և հավելել, որ ըստ պայմանավորվածության, իրենց բերած ապրանքատեսակները վաճառում են շուկայականից ավելի ցածր գներով:
Նշենք, որ «Բերքի տոնին» հանդես են եկել Ստեփանակերտի և շրջանների մշակութային համույթները: