Այսօր՝ հոկտեմբերի 8-ին, Ստեփանակերտի Վերածննդի հրապարակում Գյուղատնտեսության աշխատողի մասնագիտական օրվան նվիրված կազմակերպված «Բերքի տոն»-ին, իրենց ազգային ուտեստներով ներկայացել են Արցախում ապրող տարբեր ազգերի ներկայացուցիչներ:
«Բերքի տոն»-ին իրենց ազգային ուտեստներն են ներկայացրել Արցախում ապրող տարբեր ազգերի ներկայացուցիչներ
ՍՏԵՓԱՆԱԿԵՐՏ, 8 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ Հնդկաստանից Արցախ Սանդիկ Սին Սհալիվալը տեղափոխվել է մեկ տարի առաջ, երբ համացանցով ծանոթացել է Հասմիկ Դանիելյանի հետ, ապա ամուսնացել է նրա հետ և մշտական բնակություն հաստատել Քաշաթաղի շրջանի Բերձոր քաղաքում: Բերքի տոնին Սանդիկն ու Հասմիկը ներկայացրել են հնդկական ազգային կերակրատեսակներ՝ կաթնային խմորեղեն, բամիայով կերակրատեսակ և ջելաբի: Հասմիկը նշում է, որ Սանդիկը հաճույքով է համտեսում նաև արցախյան կերակրատեսակները, հատկապես ժենգյալով հացը, իսկ վերջերս անգամ սովորել է պատրաստել կուրկուտ:
Սանդիկ Սին Սհալիվալն ասել է, որ սիրում է Արցախը, քանի որ այստեղ մարդիկ բարյացակամ են, իսկ բնությունը շատ գեղեցիկ է:
Թամար Խումբարյանը արդեն մեկ տարի է, ինչ Լիբանանից տեղափոխվել է Արցախ և ապրում է Քաշաթաղի շրջանի Աղավնո համայնքում: Նրա խոսքով՝ այսօր ներկայացրել են Լիբանանի ազգային խոհանոցը՝ մասնավորապես լահմաջոն, բիբարով հացը, քաղցրաբլիթները, ծիրանով տորթը և մի շարք այլ կերակրատեսակներ, որոնք, ըստ մեր զրուցակցի, մարդիկ հաճույքով են փորձել:
Իսկ Սիրիայի ազգային խոհանոցի կերակրատեսակները ներկայացրել է Արցախ մշտական բնակության տեղափոխված Ծովինար Երեմյանը: Վերջինս մասնավորապես նշել է, որ համտեսի է ներկայացրել քյուֆթան, մութաֆալը և այլն:
Ասորական ազգային կերակրատեսակները ներկայացրել է Քաշաթաղի շրջանի Իշխանաձոր համայնքում ապրող Կարինե Պիրոյեվան: Մեր զրուցակիցը նշել է, որ ներկայացրել է ասորական մութուխա քաղցրավենիքը, որը պատրաստվում է միայն տոն օրերին: Ասորիները այն համարում են նշխարք և բաժանում են տնից-տուն:
Ռուսաստանի Դաշնությունից Արցախ տեղափոխված Մարինե Դանիելյանն էլ ներկայացրել է ռուսական ազգային կերակրատեսակներից սոլյանկան, պլեմենին, բիլինան և ուխան: Նրա խոսքով՝ արցախցիները հաճույքով են համտեսում ռուսական ավանդական ուտեստները, այդ պատճառով, որոշել է Բերքի տոնին մյուս երկրների ազգային կերակրատեսակների հետ ինքն էլ ներկայացնել ռուսականը:
