Առաջիկա երեք տարիների ընթացքում ծավալուն աշխատանքներ կիրականացվեն կառավարման գրեթե բոլոր օղակներում:
Ծավալուն աշխատանքներ կիրականացվեն կառավարման գրեթե բոլոր օղակներում. Բակո Սահակյան
ՍՏԵՓԱՆԱԿԵՐՏ, 16 հոկտեմբերի, ԱՐՑԱԽՊՐԵՍ: Այս մասին այսօր՝ հոկտեմբերի 16-ին, հրավիրված ընդլայնված խորհրդակցությանը, որը նվիրված էր Արցախի Հանրապետության Նախագահի 2017-2020 թվականների ծրագրի հիմնական դրույթներին, ասել է հանրապետության Նախագահ Բակո Սահակյանը:
«Ինչպես գիտեք, նոր Սահմանադրության համաձայն՝ փոխվել է մեր երկրի կառավարման ձեւը, ինչը էական փոփոխություններ է մտցրել պետական կառավարման համակարգի մեջ:Սակայն, սահմանադրական բարեփոխումները, բնական է, չեն վերանայել մեր երկրում պետականաշինության փիլիսոփայությունը. Արցախի Հանրապետությունը եղել է, կա եւ կմնա ազատ, անկախ, ժողովրդավարական եւ սոցիալական պետություն:
Այս գաղափարները հիմնարար են, եւ այսուհետ էլ կարվի հնարավորը ժողովրդավարական սկզբունքներին համապատասխան մեր պետականության ամրապնդման ուղղությամբ»,- ասել է Բ. Սահակյանը և հավելել, որ հետեւողական ու սկզբունքային աշխատանք կտարվի պետական կառավարման եւ տեղական ինքնակառավարման համակարգերում նախատեսվող բարեփոխումներն ավարտին հասցնելու եւ դրանց գործունեությունը առավել արդյունավետ ու թափանցիկ դարձնելու ուղղությամբ:
Ըստ Նախագահի, առաջին հերթին կիրականացվեն բարեփոխումներ՝ ուղղված իրավական դաշտը Արցախի Հանրապետության Սահմանադրությանը համապատասխանեցնելուն, որտեղ բավականին լուրջ անելիքներ կան: Նոր Սահմանադրությանը համապատասխան` պետք է ընդունվեն կամ փոփոխվեն ութ տասնյակից ավելի օրենքներ: Իրավական ակտերի համապատասխանեցումը Սահմանադրությանն արդեն իսկ ակտիվորեն ընթանում է եւ ավարտին կհասցվի երեք տարվա ընթացքում:
