Ցանկացած ազգի համար մամուլը կարևոր դերակատարություն ունի, որը նաև արտահայտում է տվյալ ազգի մշակութային զարգացվածության աստիճանը:
Տպագիր մամուլն այսօր որոշակի ճգնաժամ է ապրում. Արցախի ժուռնալիստների միության նախագահ
ՍՏԵՓԱՆԱԿԵՐՏ, 16 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում՝ անդրադառնալով հայկական տպագիր մամուլի աշխատակիցների մասնագիտական տոն օրվան ասել է Արցախի ժուռնալիստների միության նախագահ Կիմ Գաբրիելյանը:
«Հայկական տպագիր մամուլը ևս մեծ դերակատարություն ունի: Մադրասում «Ազդարար» տպագիր թերթի լույս ընծայումից հետո 1874 թվականին Շուշիում լույս է տեսել «Հայկական աշխարհ» թերթը, որը ևս վկայում է, որ Արցախը հայկական բնաշխարհի մի մասն է: Իմ կարծիքով այսօր տպագիր մամուլն որոշակի ճգնաժամ է ապրում, քանի որ դրան փոխարինելու են եկել էլեկտրոնային և եթերային լրատվամիջոցները:
Էլեկտրոնային լրատվամիջոներն իրենց օպերատիվությամբ, մեծ լսարանով կարողանում են որոշակի տեղ գրավել լրատվադաշտում: Ես չեմ կարծում, որ հայկական տպագիր մամուլը երբևէ կկարողանա իր դերակատարությունը թողնել: Այսօր նկատելի է նաև այն հանգամանքը, որ մարդկանց մի մասը հնարավորություն ունենալով օգտվել էլեկտրոնային մամուլից՝ նախընտրում են տպագիր թերթ ընթերցել»,-մանրամասնել է Կ. Գաբրիելյանը և հավելել, որ արցախյան լրատվադաշտում տպագիր մամուլը շատ կարևոր դեր ունի՝ այդ թվում հանրապետական, գերատեսչական, շրջանային, ստեղծագործական միությունների և կուսակցությունների թերթերը:
Խոսելով մամուլի անաչառության մասին՝ Կ. Գաբրիելյանն ասել է, որ աշխարհում չկա մի լրատվամիջոց, որը կկարողանա ամբողջական ազատ և իրական լինել:
«Կարևորն այն է, որ լրատվամիջոցն անդրադառնում է այն գործընթացներին, որոնք տեղի են ունենում մեր երկրում: Հետևելով մեր լրատվամիջոցներին տեսնում ենք այն գլխավոր խնդիրները, որոնք գոյություն ունեն մեր երկրի հիմքում: Մամուլում ունենք նաև այնպիսի հրապարակումներ, որտեղ ներկայացված են առկա թերություններն ու բացթողումները: Պետք է նկատենք նաև, որ Արցախում լրագրողական կոռեկտությունը բարձր է, քան հարևան երկրներում»,-մասնավորապես նշել է Կ. Գաբրիելյանը:
Կ. Գաբրիելյանի հավաստմամբ՝ լրատվադաշտում առաջին հերթին պետք է ավելի շատ տեղ տալ հանրային խոսքին, այսինքն՝ հանրային տարբեր շերտերի ներկայացուցիչներ պետք է կարողանան իրենց խնդիրներն արտահայտեն մամուլի միջոցով, քանի որ մամուլը մի հարթակ է, որը պատկանում է բոլորին և որի միջոցով կարելի է մի շարք խնդիրներ վերհանել, ինչպես նաև լրագրողական աշխատանքում ավելի համարձակ լինեն:
«Մամուլի աշխատողի օրվա առթիվ ուզում եմ շնորհավորել իմ գործընկերներին՝ ցանկանալով առավել համարձակություն, ստեղծագործական նորանոր հաջողություններ»,- նշել է Կ. Գաբրիելյանը և ավելացրել, որ մամուլի առաքելությունը կարևոր է տվյալ ժողովրդի կայացման ու զարգացման տեսանկյունից, քանի որ այն մեր իրականության հայելին է, որն արտացոլում է առկա թերություններն ու խնդիրները:
Հիշեցնենք, որ ՀՀ կառավարության 2004 թվականի ապրիլի 22-ի որոշմամբ՝ հոկտեմբերի 16-ը նշվում է որպես «Մամուլի աշխատակցի օր», որը հետագայում վերանվանվեց և դարձավ Հայ մամուլի օր: Այս օրը նշանավորվել է Մադրասում հայկական առաջին «Ազդարար» տպագիր պարբերականի հրատարակությամբ: