Բրիտանական «Birtlink» կազմակերպության ներկայացուցիչ Կետի և Պոլլ Մելորները Ստեփանակերտի «Մոր և մանկան առողջության պահպանման կենտրոն»-ին են նվիրաբերել նորածինների լսողության (աուդիոմետրիկ) սկրինինգի սարք:
Նորածին երեխաների խնամքի համար Ստեփանակերտի ծննդատունը նոր սարքավորում է ստացել
ՍՏԵՓԱՆԱԿԵՐՏ, 17 հոկտեմբերի, ԱՐՑԱԽՊՐԵՍ: Կետի Մելորը և իր հետ ժամանած մասնագետներն արդեն երկրորդ օրն է, ինչ «Մոր և մանկան առողջության պահպանման կենտրոն»-ում անց են կացնում ուսուցողական և գործնական դասընթացներ, որի ընթացքում ծննդատան անձնակազմը ծանոթանում և փորձարկում է նորածինների լսողության նոր սարքը:
«Արցախպրես»-ի թղթակցի հետ զրույցում Արցախի առողջապահության նախարար Կարինե Աթայանն ասել է, որ նեոնատալ սկրինինգը-նորածինների հետազոտության պետական ծրագիր է, որի նպատակն է վաղ շրջանում հայտնաբերել լուրջ գենետիկական հիվանդությունները, հակառակ դեպքում երեխաների մոտ առաջանում են այդ հիվանդությունների լուրջ բարդություններ և հաշվանդամություն:
«Երևանում 2005 թվականից իրականացվում են որոշ սկրինինգային ծրագրեր, իսկ ամբողջ Հայաստանի Հանրապետությունում՝ 2013 թվականից: 2008 թվականից մի քանի անգամ մենք փորձել ենք ներդնել Արցախում նեոնատալ սկրինինգները, սակայն տարբեր պատճառներով այն չի հաջողվել: Արա Բաբլոյանի նախաձեռնությամբ և աջակցությամբ այս տարի սկիզբ է դրվել նորածինների հիպոթիրեոզի սկրինինգն Արցախում, որին զուգահեռ մենք աշխատում էինք Կետի Մելորի հետ, ով համաձայնվել է «Մոր և մանկան առողջության պահպանման կենտրոն»-ն ապահովվել հատուկ սարքով, որի օգտագործման շնորհիվ կիրականացվի նորածինների լսողության սկրինինգը: Սկզբնական շրջանում այն կիրականացվի Ստեփանակերտում, այնուհետև շրջաններում»,- մանրամասնել է Կ. Աթայանը և ավելացրել, որ նաև աշխատանքներ են տարվում նորածինների կոնքազդրային հոդի ուլտրաձայնային հետազոտության սկրինինգի ուղղությամբ՝ կոնքազդրային հոդի բնածին պաթոլոգիաների հայտնաբերման նպատակով:
Կետի Մելորն էլ մեզ հետ զրույցում ասել է, որ արդեն 10 տարի է, ինչ բրիտանական «Birtlink» կազմակերպությունն Արցախում իրականացնում է նործինների խնամքին վերաբերող ծրագրեր:
«Մենք ցանկանում ենք տարեցտարի ավելի բարելավել մեր կողմից մատուցվող ծառայությունները, որպեսզի այն հասանելի լինի ոչ միայն Ստեփանակերտի, այլ նաև Արցախի բոլոր շրջանների համար: Ի դեպ, մի քանի տարի առաջ մենք սարքավորումներ ենք տրամադրել նաև շրջաններին: Ամբողջ աշխարհում երեխաների նորածնային շրջանում կիրառում են տարբեր սկրինինգներ, որոնք որ հնարավորություն են տալիս վաղ շրջանում բացահայտել նորածինների մոտ առկա խնդիրները և դրանց կանխումը:Դրանցից մեկն էլ նորածնային լսողության խնդիրների բացահայտելն է, և եթե վաղ ժամանակում չհայտնաբերենք դրանք, ապա հետագայում հնարավոր է, որ երեխաներն իրենց կյանքում լուրջ խնդիրներ ունենան: Մենք էլ փորձում ենք, մեր գործունեությամբ այդպիսի ռիսկային գործոն ունեցող երեխաներին նորմալ կյանք վարելու հնարավորություն տալ: Տեղի մասնագետները պետք է պարբերաբար վերապատրաստման դասընթացների մասնակցեն, այդ կերպ՝ տեղեկանալով բժշկության նորամուծություններին»,- մասնավորապես ասել է Կետի Մելորը:
Անցկացվող դասընթացին ներկա էր նաև ՀՀ առողջապահության նախարարության գլխավոր նեանոտոլոգ Պավել Մազմանյանը, ով ևս աջակցել է դասընթացներին:
Նշենք նաև, որ ընթացիկ տարում Կետին Մելորը Ստեփանակերտի «Մոր և մանկան առողջության պահպանման կենտրոն»-ի նեոնատալ բաժանմունքին էր տրամադրել երկու նոր ինֆուզոմատներ, նորածինների շնչառական թերապիայի ապարատ, երկու օպտիֆլո փոխարինել է նորով, ինչպես նաև այլ բժշկական պարագաներ, իսկ Մարտակերտի շրջանային բուժմիավորմանը՝ նորածինների մոտ դեղնախտի բուժման համար ֆոտոթերապիայի սարք:
