Վարշավայի Միխալ Օչապովիչի անվան Գյուղատնտեսության կենտրոնական գրադարանի դահլիճում նոյեմբերի 15-ին տեղի է ունեցել Ռեչ Պոսպոլիտայում հայերի 650-ամյա ներկայությանը նվիրված գիտաժողով, որը Լեհաստանում ՀՀ դեսպանության պատվո հովանու ներքո կազմակերպել են Լեհաստանի ներքին գործերի և վարչարարության նախարարությունը, Լեհաստանի Գյուղատնտեսության կենտրոնական գրադարանը և Լեհաստանում Հայկական հիմնադրամը:
Վարշավայում կայացել է Լեհաստանի հայ համայնքի պատմությանը նվիրված գիտաժողով
ՍՏԵՓԱՆԱԿԵՐՏ, 16 նոյեմբերի, ԱՐՑԱԽՊՐԵՍ: Այս մասին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից՝ հավելելով. «Գիտաժողովին մասնակցեցին Լեհաստանի կառավարության, խորհրդարանի, գիտական և ակադեմիական շրջանակների ներկայացուցիչներ, հոգևորականներ, ինչպես նաև հայ համայնքի և լեհ հասարակության ներկայացուցիչներ: Գիտաժողովի բացմանը ողջույնի խոսքով հանդես եկավ Լեհաստանում ՀՀ դեսպան Էդգար Ղազարյանը, ով շնորհակալություն հայտնեց գիտաժողովի կազմակերպիչներին՝ ընդգծելով Լեհաստանում հայերի դերակատարության թեմայի կարևորությունը: Գիտաժողովին ընթերցվեց Լեհաստանի արտաքին գործերի նախարարի տեղակալ Յան Դիդիչակի ողջույնի խոսքը, որտեղ ԱԳ փոխնախարարը հիշատակել էր Լեհաստանի դիվանագիտության ասպարեզում հայերի կարևոր և նշանակալի ներգրավվածության մասին: Գիտաժողովի բացմանը ողջույնի խոսքով հանդես եկան նաև Լեհաստանի Գյուղատնտեսության կենտրոնական գրադարանի տնօրեն Զբիգնև Ֆիլիպկովսկին և Լեհաստանի Հայկական հիմնադրամի նախագահ Մարթա Աքցենտովիչ-Բոհոսևիչը: Գիտաժողովին Լեհաստանի հայ համայնքի պատմությանը նվիրված զեկույցներով հանդես եկան Լեհաստանի Կաթոլիկ եկեղեցու վարդապետ, Արքեպիսկոպոս Անտոնի Դիդիչը, Վարշավայի Կարդինալ Վիշինսկու անվան համալսարանի պրոֆեսոր, Հայ Կաթողիկե Եկեղեցու հոգևորական Յուզեֆ Նաումովիչը, Լյուբլինի կաթոլիկ համալսարանի պրոֆեսորներ Վլադիմիժ Օսադչին և Միեշչիսլավ Ռիբան: Գիտաժողովի ընթացքում Լեհաստանի Գյուղատնտեսության կենտրոնական գրադարանի ճեմասրահում ցուցադրվեցին Լեհաստանի հայ համայնքի, նշանավոր լեհահայ գործիչների մասին տեղեկատվական ցուցապաստառներ»: