«Ջինիշյան» հիմնադրամի նախաձեռնությամբ և աջակցությամբ Ստեփանակերտի «Արևիկ» մանկական բուժմիավորումում տեղի է ունեցել «Յոդի հագեցվածության հիմնախնդիրները» թեմայով դասախոսություն:
Ստեփանակերտում տեղի է ունեցել «Յոդի հագեցվածության հիմնախնդիրները» թեմայով դասախոսություն
ՍՏԵՓԱՆԱԿԵՐՏ, 23 նոյեմբերի, ԱՐՑԱԽՊՐԵՍ: Թեման ներկայացրել է հանրային առողջապահության մասնագետ Սիսակ Բաղդասարյանը:
«Արցախպրես»-ի թղթակցի հետ զրույցում Սիսակ Բաղդասարյանն ասել է, որ յոդի անբավարարության պատճառով առաջացող խանգարումները հանրային առողջության առաջնային խնդիրներից են: «Բազմաթիվ հիվանդությունների պատճառը հաճախ յոդի անբավարարությունն է, դրա համար էլ Արցախում և Հայաստանում կատարել ենք յոդի հագեցվածության հետազոտություններ: Հանդիպման նպատակը հենց այդ հետազոտությունների արդյունքները տեղի էնդոկրինոլոգներին, թերապևտներին, մանկաբույժ-գինեկոլոգներին, վիճակագիրներին ներկայացնելն է,- ասել է Ս. Բաղդասասրյանը և ավելացրել,- որ Արցախում հետազոտություններն անց են կացվել պատահականության սկզբունքով ընտրված 30 դպրոցների 8-12 տարեկան երեխաների շրջանում և հետազոտության համար վերցրվել է մեզի 850 նմուշ:
Հետազոտվել է նաև կենցաղում կիրառվող կերակրի աղը, քանի որ հայտնի է, որ յոդի հիմնական պաշարը մարդիկ ստանում են հենց կերակրի աղից»:
Ս. Բաղդասարյանն ընդգծել է, որ համապատասխան ուսումնասիրություններից պարզվել է. «Արցախում և Հայաստանում ապրող մարդկանց օրգանիզմում յոդի անբավարարություն չկա, և նրա հագեցվածության մակարդակը համապատասխանում է պահանջվող նորմային»:
Իսկ ՀՀ առողջապահության ազգային ինստիտուտի առողջապահական տեղեկատվական կենտրոնի ազգային ռեգիստրի ղեկավար Նարինե Գալստյանը, ով սեմինարին հանդես է եկել «Վահանաձև գեղձի հիվանդությունների տարածվածությունը» թեմայով դասախոսությամբ, մեզ հետ զրույցում նշել է, որ իրենք նման դասախոսությունների միջոցով Արցախի և Հայաստանի բժիշկներին ներկայացնում են յոդի հագեցվածության մասին տարածաշրջանում կատարած հետազոտությունների արդյունքները: «Լինելով պրակտիկ բժիշկ՝ միշտ մտածել եմ, որ ունենք յոդի խնդիր, բայց մեր երկարատև ուսումնասիրություններից պարզվել է, որ յոդի անբավարարություն մեզ մոտ չկա»,-հավելել է Ն. Գալստյանը և ավելացրել, որ թեմայի շուրջ արդեն հանդիպել են Հադրութի իրենց գործընկերների հետ, իսկ վաղը կայցելեն Մարտակերտ: