Այս օրերին ԱՄՆ-ում գտնվող Արցախի հոգևոր թեմի առաջնորդ Պարգև արքեպիսկոպոս Մարտիրոսյանը «Հայաստան» համահայկական հիմնադրամի ամենամյա Հեռուստամարաթոնին հանդես է եկել իր օրհնանքի խոսքով:
Ծրագիրը ռազմավարական նշանակություն ունի Արցախի համար. Պարգև Սրբազան
ՍՏԵՓԱՆԱԿԵՐՏ, 24 նոյեմբերի, ԱՐՑԱԽՊՐԵՍ: Պարգև Սրբազանը նշել է, որ այս տարվա հանգանակած գումարները հիմնականում ուղղվելու են Արցախի գյուղատնտեսության զարգացմանը, ինչը կենսական նշանակություն ունի տեղում ապրող բնակչության համար:
«Արցախի հողերի մի զգալի մասը անմշակ է, քանի որ ջրային ռեսուրսները գտնվում է երկրի հյուսիս-արևմուտքում, իսկ լավագույն հողերը՝ հարավ-արևելքում՝ ճիշտ հակառակ ուղղությամբ: Եթե մենք հողի ընդերքից արտեզյան ջրհորների միջոցով հանենք ջուրը և ոռոգենք դաշտերը, ապա մեծ ծավալի բերք կստանանք, և ժողովուրդը շատ ավելի լավ կապրի»,- ասել է Արցախի թեմի առաջնորդը և կարևորել, որ ծրագիրը ռազմավարական նշանակություն ունի:
Պարգև արքեպիսկոպոս Մարտիրոսյանը իր խոսքում բարձր է գնահատել «Հայաստան» համահայկական հիմնադրամի 25-ամյա գործունեությունը՝ իր երախտագիտությունը հայտնելով ողջ հայությանը: Նրա խոսքով՝ Հիմնադրամի շնորհիվ անցած տարիների ընթացքում Արցախի գրեթե ամեն գյուղում մեկ իրականացված ծրագիր կա: