Ստեփանակերտի Սայաթ-Նովայի անվան երաժշտական քոլեջի դահլիճում տեղի է ունեցել Հայ հեղափոխական դաշնակցության Արցախի կառույցի կողմից կազմակերպված ՀՅԴ 127-ամյակի հանդիսավոր միջոցառումը:
Ստեփանակերտում կայացել է ՀՅԴ 127-ամյակին նվիրված միջոցառում
ՍՏԵՓԱՆԱԿԵՐՏ, 15 դեկտեմբերի, ԱՐՑԱԽՊՐԵՍ: Միջոցառումը բացվել է ԱՀ և ՀՅԴ օրհներգերով:
«Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել ՀՅԴ Արցախի Կենտրոնական կոմիտեի անդամ, ԱՀ ԱԺ փոխնախագահ Վահրամ Բալայանը՝ ասելով, որ ամեն տարի, նշելով Դաշնակցության օրը, կուսակցությունն ինչ-որ մի տեղ էլ ժողովրդին յուրօրինակ հաշվետվություն է տալիս իր կատարածի մասին:
«Այդ օրը մեզ համար առավել շատ ծառայում է որպես հարթակ՝ ներկայացնելու ոչ հեռավոր ապագային միտված մեր անելիքները: Դաշնակցության և արցախահայության գործողությունների համադրումը պատահական չէ, որովհետև Դաշնակցությունը մեր ժողովրդի էությունից բխող արժեհամակարգի ծնունդ է: ՀՅ դաշնակցության համար բարձրագույն արժեքներ են մարդը, նրա ազգային արժանապատվությունն ու իրավունքը: Այդ տեսանկյունից 19-րդ դարի վերջերից Դաշնակցությունը հայության մեջ ոչ միայն իր ուժերի նկատմամբ վերականգնեց վստահությունը, այլև ներարկեց իր հայրենիքում ազատ ապրելու և ազգային պետականություն ունենալու գաղափարը: Արձանագրելով այս փաստերը՝ մենք միանշանակ կարող ենք ասել, որ Լեռնային Ղարաբաղի հակամարտությունը ոչ միայն կարող ենք լուծել ազգերի ինքնորոշման իրավունքի հիման վրա, այլ նաև տարածքային ամբողջականության սկզբունքով: Այսօր Արցախի Հանրապետության միջազգային իրավական տեսանկյունից ճանաչումը ՀՅԴ բոլոր կառույցների գերխնդիրն է»,-մասնավորապես ասել է Վ. Բալայանը:
Միջոցառմանը ելույթով հանդես է եկել Արցախի թեմի առաջնորդ Պարգև արքեպիսկոպոս Մարտիրոսյանը:
«ՀՅԴ-ն հայ ազգի համար իսկապես մեծ առաքելություն է իրականացրել: Միշտ էլ թե՛ հայրենիքում և թե՛ Սփյուռքում Դաշնակցությունը աչքի է ընկել ազգապահպանության մեծագույն առաքելությամբ: Ուրախ եմ, որ Դաշնակցությունը միշտ էլ ազգային-ազատագրական պայքարի մեջ է եղել. այսօր էլ նա լծված է պետականաշինության վեհ գործին: Մենք վստահ ենք, որ համատեղ ուժերով մի օր հասնելու ենք մեր վերջնական հաղթանակին»,-նշել է Պարգև արքեպիսկոպոս Մարտիրոսյանը:
ՀՅԴ 127-ամյակի միջոցառմանը շնորհավորական խոսքերով հանդես են եկել նաև «Ժողովրդավարություն» խմբակցության ղեկավար Վարդգես Բաղրյանը և Լիբանանի ՀՅԴ «Ազդակ» թերթի գլխավոր խմբագիր Շահան Գանտահարյանը:
ՀՅԴ 127-ամյակին նվիրված տոնակատարությունը եզրափակվել է համերգային ծրագրով:
Միջոցառմանը ներկա էին դաշնակցականներ, ԱԺ պատգամավորներ, հյուրեր և այլք:
