«Մենք կարևորում և բարձր ենք գնահատում տարբեր երկրների խորհրդարանականների քաղաքական ու հասարակական շրջանակների հետաքրքրությունները Արցախի հանդեպ, նրանց կողմից մեր ժողովրդի ազատ ու անկախ ապրելու իրավունքի ընկալումը և ցուցաբերած մարդասիրական և բարոյական աջակցությունը: Նման կապերն ու համագործակցություններն օգնում են՝ միջազգային գործընթացներից արհեստականորեն մեկուսացնելու փորձերը և արդյունավետ հարթակ են օրենսդրական փորձի փոխանակման տեսանկյունից»,- ասել է Ա. Ղուլյանը:
Ա. Ղուլյանն իր ելույթում տեղեկացրել է նաև, որ 2018 թվականի փետրվարին Արցախում նշվելու է Արցախյան ազատագրական պայքարի ղարաբաղյան շարժման 30-ամյակը.այն պայքար էր, որի հիմքում ազատության, մարդու իրավունքների և ազգային արժանապատվության գաղափարներն են եղել: «Այս արժեքներն ամենուր նույնն են, նրանք չունեն ոչ կուսակցական պատկանելիություն, ոչ ազգություն և ոչ էլ աշխարհագրական սահմաններ: Անցած 3 տասնամյակներին մենք դժվարին, բայց պատվաբեր ճանապարհ ենք անցել:
Այդ ուղին անցել ենք արցախցու պահպանողական էությունը և բարեփոխիչ ազատական ոգին բարձր պահելով, ծանր զոհաբերություններով, բայց արժանապատվորեն հաղթահարելով մեզ պարտադրված պատերազմի մարտահրավերը` պետություն ստեղծելով, իշխանության երեք թևերով, մրցունակ տնտեսությամբ և տարածաշրջանի խաղաղությունը պահող բանակով,-նշել է Ա. Ղուլյանը և ընգծել,- անկախության տարիներին և նույնիսկ պատերազմական իրակվիճակում Արցախում իշխանությունները ձևավորվել են միայն ու միայն ժողովրդավարական ընտրությունների միջոցով:
Այսօր էլ, Ադրբեջանի հետ չլուծված հակամարտություն ունենալով հանդերձ, մենք շարունակում ենք կառուցել մեր երազանքների երկիրը՝ իրականացնելով սեփական ճակատագիրն ինքնուրույն տնօրինելու մեր ժողովրդի բնական ցանկությունը»:
Գագիկ Ծառուկյանը՝ խոսելով իրենց այցի նպատակի մասին իր խոսքում ասել է՝ իրենք ուզում են, որ օտարերկրյա պատգամավորներն անձամբ գան Արցախ, տեսնեն ու շփվեն արցախցիների հետ և համոզվեն, որ այստեղ ստեղծարար արցախցիները պետականություն են կերտում:
«Մենք պետք է կարողանանք Արցախը ներկայանալի դարձնենք ամբողջ աշխարհին: Իսկ եթե Ադրբեջանը հոխորտում է ինչ որ սև ցուցակների մասին՝ նշանակում է, որ նա վախենում է ճշմարտության բացահայտվելուց: Մենք ամեն հարցում սատարելու ենք արցախցիների որոշումներին՝ ապահովելով նրանց անվտանգությունը»,-ասել է Գ. Ծառուկյանը:
Նշենք, որ պատվիրակության կազմում էին նաև ՀՀ ԱԺ նախագահի տեղակալ Միքայել Մելքումյանը և Եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյան: