ՄԱԿ-ի Անվտանգության խորհուրդն այսօր կանցկացնի մերձավորարևելյան կարգավորման վերաբերյալ կանոնավոր հանդիպում, սակայն հանդիպման արդյունքներով կարող է դիտարկվել բանաձևի նախագիծը, որն անվավեր է ճանաչում Երուսաղեմի կարգավիճակի փոփոխումը:
ՄԱԿ ԱԽ-ն այսօր կարող է դիտարկել Երուսաղեմի կարգավիճակի հարցով բանաձևի նախագիծը
ՍՏԵՓԱՆԱԿԵՐՏ, 18 դեկտեմբերի, ԱՐՑԱԽՊՐԵՍ: Այս մասին հայտնում է RIA Novosti-ն։
Մերձավորարևելյան կարգավորման խնդիրը, ներառյալ պաղեստինյան հարցը, ԱԽ-ն դիտարկում է ամեն ամիս։ Իրավիճակի վերաբերյալ զեկույցով հանդես է գալիս ՄԱԿ-ի հատուկ համակարգող Նիկոլայ Մլադենովը։ Սակայն ՄԱԿ-ում Ճապոնիայի մշտական ներկայացուցչությունում հայտնել են, որ ԱԽ որոշ անդամները կարող են ելույթ ունենալ Երուսաղեմի հարցով, եթե ցանկանան բարձրացնել այդ հարցը։ Նշենք, որ Ճապոնիան դեկտեմբերին հանդիսանում է ԱԽ նախագահող երկիր։
Եգիպտոսի պատվիրակությունը շաբաթ օրն ԱԽ է մտցրել Պաղեստինի կողմից պատրաստված բանաձևի նախագիծը, որը կարող է պատասխան դառնալ Երուսաղեմն Իսրայելի մայրաքաղաք ճանաչելու ԱՄՆ նախագահի որոշմանը։
Դիվանագետները չեն բացառում, որ փաստաթղթի շուրջ քվեարկությունը կկայանա Մերձավոր Արևելքի հարցով հանդիպումից հետո, սակայն դրա պաշտոնական հաստատում դեռևս չկա։ Գործակալության որոշ զրուցակիցներ կարծում են, որ փաստաթուղթը կստանա խորհրդում ձայների մեծամասնությունը, սակայն ԱՄՆ պատվիրակությունը չի աջակցի նախագծին՝ այդպիսով կիրառելով վետո։
Երուսաղեմի կարգավիճակի փոփոխումն անվավեր ճանաչելուց բացի, բանաձևի նախագիծը կոչ է անում բոլոր պետություններին զերծ մնալ Երուաղեմում իրենց դիվանագիտական առաքելությունները բացելուց։