1990 թվականի դեկտեմբերի 18-ին ՄԱԿ-ի Գլխավոր վեհաժողովը ընդունել է աշխատավոր միգրանտների եւ նրանց ընտանիքի անդամների իրավունքների պաշտպանության Միջազգային կոնվենցիան:
Դեկտեմբերի 18-ին աշխարհը նշում է Միգրանտների միջազգային օրը
ՍՏԵՓԱՆԱԿԵՐՏ, 18 դեկտեմբերի, ԱՐՑԱԽՊՐԵՍ: Միգրանտների միջազգային օրը նշելու որոշումը կապված էր վերջին տարիներին աշխարհում միգրանտների թվի զգալի աճի հետ: Վեհաժողովը ընդգծել է բոլոր միգրանտների իրավունքների եւ հիմնարար ազատությունների նկատմամբ հարգանքի ապահովման հետագա քայլերի անհրաժեշտությունը: Փորձագետների գնահատմամբ՝ միջազգային միգրանտների ընդհանուր թիվը 2000 թվականի 175 միլիոնից 2015 թվականին հասել է 244 միլիոնի: Մոլորակի յուրաքանչյուր երեսունհինգերորդ բնակիչ միգրանտ է, որը ապրում եւ աշխատում է իր երկրից դուրս: Յուրաքանչյուր տասներորդ միգրանտի տարիքը 15-իվ տարեկանից ցածր է: Միգրանտների մեծ մասը ապրում է Եվրոպայում (76 միլիոն) եւ Ասիայում (75 միլիոն): Միգրացիոն գործընթացի հետ կապված խնդիրների անկանխատեսելիությունը, հրատապությունն ու բարդությունը համաձայնեցված գործողություններ եւ համագործակցություն են պահանջում տարածաշրջանների եւ երկրների միջեւ: Միավորված ազգերի կազմակերպությունը ակտիվ դեր է խաղում այս ոլորտում՝ նպաստելով երկրների եւ տարածաշրջանների միջեւ երկխոսության եւ փոխգործակցության ձեւավորմանը, ինչպես նաեւ խրախուսելով փորձի փոխանակումը եւ հնարավորությունների ընդլայնումը համագործակցության ոլորտում: Միգրանտների միջազգային օրը նշվում է բազմաթիվ երկրներում, միջկառավարական եւ ոչ կառավարական կազմակերպություններում մարդու իրավունքների եւ միգրանտների հիմնարար ազատությունների մասին տեղեկատվության տարածման, ինչպես նաեւ ներգաղթյալների իրավունքների մասին օրենքները բացատրող տարբեր ակցիաների եւ աշխատանքային սեմինարների միջոցով: