ՌԴ ԱԳ նախարար Սերգեյ Լավրովի հայտարարությունն այն մասին, Լեռնային Ղարաբաղի հակամարտությունը հնարավոր չէ լուծել մեկ փաստաթղթով, հարկավոր է փուլային մոտեցում, կարելի է մեկնաբանել տարբեր կերպ:
Լավրովը նկատի ուներ, որ չի կարող լինել շրջանակային համաձայնագիր, եթե կողմերը չեն համաձայնեցրել ԼՂ կոնֆլիկտի կարգավորման սկզբունքները. Կ. Բեքարյան
ՍՏԵՓԱՆԱԿԵՐՏ, 16 հունվարի, ԱՐՑԱԽՊՐԵՍ: Tert.am-ի հետ զրույցում ասաց ԱԺ ՀՀԿ խմբակցության պատգամավոր Կարեն Բեքարյանը:
«Լավրովի ասածի մեջ ինչ-որ փակագծեր մնացին լիարժեք չբացված: Ամեն դեպքում, կարծում եմ, որ Լավրովը նկատի ունի հետևյալը, որ փուլերը փաստաթղթերին են վերաբերում: Տարիներ շարունակ ասվել է՝ նախ պետք է լինի համաձայնեցված փաստաթուղթ սկզբունքների շուրջ, որից հետո շրջանակային համաձայնագիր պետք է պատրաստվի, կնքվի: Չեմ բացառում, որ հենց սա նկատի ունի Լավրովը՝ սկզբունքներ, ապա շրջանակային համաձայնագիր»,- մանրամասնեց Կարեն Բեքարյանը:
Պատգամավորը նշեց, որ հնարավոր է նաև, որ Լավրովը նկատի է ունեցել այն, որ պետք է դիտարկել մոտեցումներ, որոնք հետագայում քննարկումների առիթ կստեղծեն:
«Երբ ԵԱՀԿ Մինսկի խմբի համանախագահները առաջարկում էին սկզբունքները, դրանք իրենց մեջ ունեին տրամաբանական կիրարկման կարգ, որոնք միասնական չէին: Գուցե նա նկատի ունի այն, որ փաստաթուղթը ֆիքսում է ամեն ինչ, բայց իրականացվում է փուլերով: Սա տրամաբանական է: Գուցե նկատի ունի որևէ այլ բա՞ն, չեմ կարծում»,- նշեց Կ. Բեքարյանը:
Վերջին շրջանում, նրա խոսքով, բանակցությունների սեղանին շրջանառվում է կարգավորման սկզբունքներին վերաբերող փաստաթուղթ, իսկ շրջանակային փաստաթուղթը քննարկման չի դրվել, որովհետև սկզբունքները համաձայնեցված չեն:
«Համաձայնեցված սկզբունքները պետք է դառնան շրջանակային փաստաթղթի մշակման ուղենիշը: Կհիշեք հավանաբար, որ համանախագահները հայտարարում էին, թե պետք է համաձայնեցնել սկզբունքները, հետո անցում կատարել շրջանակային համաձայնագրի մշակմանը, իսկ Ադրբեջանն ասում էր, որ ոչ, եկեք միանգամից քննարկենք շրջանակայինը:
Ստացվում է փաստաթղթի երկու փուլ՝ սկզբունքներ, շրջանակային համաձայնագիր, որը կարգավորման փուլային տարբերակը չէ, մոտեցում է, տրամաբանական մոտեցում է: Շրջանակային համաձայնագիրը պետք է մշակված լինի համաձայնեցված սկզբունքների փաստաթղթի վրա, հակառակ դեպքում, շրջանակային համաձայնագրի համաձայնեցումը գրեթե անհնար կդառնա»,- նշեց նա:
Կարեն Բեքարյանը հիշեցրեց, որ մեծ սպասում էր առաջացել, դրական ակնկալիքներ էին ձևավորվել Կազանի հանդիպումից առաջ, որովհետև ԵԱՀԿ Մինսկի խմբի համանախագահ երեք պետությունների ԱԳ նախարարները հայտարարում էին, որ հասել ենք այն կետին, երբ սկզբունքների փաստաթուղթը կստորագրվի:
«Եթե դուրս բերեք այդ օրվա հայտարարությունները, կտեսնեք, որ դրանք հիմնականում հետևյալի մասին էին, որ այ հիմա կստորագրվի սկզբունքների մասին փաստաթուղթը, որն էլ հնարավորություն կտա անցնել շրջանակային համաձայնագրի շուրջ բանակցություններ մեկնարկելուն»,- ասաց Բեքարյանը՝ շեշտելով, որ Կազանի հանդիպումը տապալվեց Ադրբեջանի պատճառով:
Պատգամավորի խոսքով՝ ամենևին պատահական չէ, որ Լավրովը նման հայտարարություն է հնչեցնում Հայաստանի և Ադրբեջանի արտաքին գործերի նախարարների առաջիկա հանդիպումից առաջ:
«Սերգեյ Լավրովը կարևոր մի հայտարարություն արեց, որ հնարավոր չէ առաջխաղացում ապահովել հակամարտության կարգավորման գործընթացում, եթե շփման գիծը հանգիստ չէ: Սա որոշակիորեն ուղերձ է, որ պետք է կյանքի կոչել այն համաձայնությունները, որոնք կան շփման գծում լարվածությունը նվազեցնելու համար»,- ասաց նա:
Կարեն Բեքարյանն ասաց, որ իր կարծիքով ԱԳ նախարարների հանդիպումը բեկումնային չէ, բայց հնարավոր է հող նախապատրաստի նախագահների հանդիպման համար:
