Թուրքիայի ընդդիմադիր Ժողովրդադեմոկրատական կուսակցության անդամ, խորհրդարանի հայազգի պատգամավոր Կարո Փայլանը դեմ է արտահայտվել թուրքական ԶՈւ-ի կողմից սիրիական Աֆրինում իրականացվող «Ձիթենու ճյուղ» ռազմական գործողությանը:
Կարո Փայլանը դեմ է արտահայտվել Աֆրինում Թուրքիայի ռազմական գործողությանը
ՍՏԵՓԱՆԱԿԵՐՏ, 26 հունվարի, ԱՐՑԱԽՊՐԵՍ: «Պատերազմին աջակցողներն էլ են պատերազմի հանցագործ, «ո՛չ» ասեք Աֆրինի պատերազմին, այս հանցանքին մասնակից մի՛ դարձեք»,- գրել է հայազգի պատգամավորը Twitter-ի իր պաշտոնական էջում:
Կարո Փայլանը նաև ուշադրություն է հրավիրել այն փաստի վրա, որ իշխանությունները փորձում են լռեցնել բոլոր այն լրագրողներին ու մտավորականներին, որոնք դեմ են արտահայտվում այս ռազմական գործողությանը:
«Նրանք փորձում են լռեցնել իրականությունը պատմողներին, խաղաղության կողմնակիցներին: Խաղաղություն ցանկանալը հանցանք չէ», - ասել է Փայլանը:
Հիշեցնենք, որ հունվարի 20-ին թուրքական ԶՈւ-ն սկսել է Սիրիայի հյուսիսում գտնվող քրդական ազգային զինված ջոկատների (PYD/YPG) դեմ ռազմական գործողությունը, որը ստացել է «Ձիթենու ճյուղ» անվանումը: Օդային առաջին հարձակումներից հետո, հունվարի 21-ին թուրքական ԶՈւ-ի զինվորականներն անցել են լայնամասշտաբ հարձակման նաև ցամաքում: Հայտնի է, որ թուրքական ԶՈւ-ին աջակցում է «Սիրիական ազատ բանակ» ընդդիմադիր խմբավորումը՝ ինչպես 2016թ.-ին ձեռնարկված «Եփրատի վահան» գործողության ժամանակ: