Հռոմում Հայաստանի արտաքին գործերի նախարարի տեղակալ Աշոտ Հովակիմյանը հունվարի 29-ին մասնակցեց ԵԱՀԿ իտալական նախագահության կողմից կազմակերպված «ԵԱՀԿ տարածաշրջանում հակասեմիտիզմի և դրա հողի վրա այլատյացության հանցանքների դեմ պայքարում պետությունների, հաստատությունների և անհատների պատասխանատվությունը» խորագրով միջազգային խորհրդաժողովին:
Աշոտ Հովակիմյանը Հռոմում մասնակցել է հակասեմիտիզմի դեմ պայքարին նվիրված միջազգային խորհրդաժողովին
ՍՏԵՓԱՆԱԿԵՐՏ, 30 հունվարի, ԱՐՑԱԽՊՐԵՍ: Այս մասին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից:
Խորհրդաժողովի մասնակիցներին ընդունեց Հռոմի Սրբազան քահանայապետ Ֆրանցիսկոս Պապը:
Խորհրդաժողովին բացման ելույթով հանդես եկավ ԵԱՀԿ գործող նախագահ, Իտալիայի արտգործնախարար Անջելինո Ալֆանոն։ Հանդիպմանը մասնակցում էին ԵԱՀԿ մասնակից մի շարք երկրների նախարարներ և փոխնախարարներ, ԵԱՀԿ Գլխավոր քարտուղարը, ԵԱՀԿ ԺՀՄԻԳ տնօրենը, հրեական համաշխարհային և եվրոպական կամակերպությունների ղեկավարներ։
Խորհրդաժողովին քննարկվեցին անհանդուրժողականության և խտրականության դեմ պայքարի հարցեր՝ հակասեմիտիզմի հատուկ շեշտադրմամբ:
Նախարարի տեղակալ Հովակիմյանն իր ելույթում նշեց, որ Հոլոքոստի հիշատակի օրվա կապակցությամբ Հռոմում հակասեմիտիզմի դեմ պայքարի թեմայով խորհրդաժողովի կազմակերպումը խորհրդանշական բնույթ ունի: Նա ընդգծեց, որ հարգանքի տուրք մատուցելով նացիստական ռեժիմին զոհ գնացած հրեաներին, միջազգային հանրությունը պետք է վերահաստատի իր հանձնառությունը մարդու իրավունքներին և կրոնական, էթնիկ և ազգային խոցելի խմբերի պաշտպանությանը ու երաշխավորի, որ ցեղասպանություններ և մարդկության դեմ այլ հանցանքներ այլևս չեն կրկնվի:
ԱԳ նախարարի տեղակալ Հովակիմյանը նշեց, որ հայ և հրեա ժողովուրդների հարաբերությունները հազարամյակների պատմություն ունեն, Հայաստանի հրեական համայնքն ակտիվ մասնակցություն է ունենում երկրի սոցիալական և մշակութային կյանքում: Նա անդրադարձավ Հայաստանում հրեաների պատմամշակութային ժառանգության պահպանման ուղղությամբ ՀՀ իշխանությունների կողմից գործադրվող ջանքերին՝ այդ համատեքստում նշելով Եղեգիսի միջնադարյան հրեական գերեզմանատան վերականգնողական աշխատանքների մասին:
Աշոտ Հովակիմյանը կարևորեց ցեղասպանության հիշատակման և կրթության վերաբերյալ ԵԱՀԿ հանձնառությունների կատարումը: ՄԱԿ-ի Մարդու իրավունքների համընդհանուր հռչակագրի և Ցեղասպանության հանցագործությունը կանխարգելելու ու դրա համար պատժի վերաբերյալ ՄԱԿ-ի կոնվենցիայի 70-ամյակի կապակցությամբ նա կոչ արեց շարունակել հավատարիմ մնալ նշյալ առանցքային փաստաթղթերի տառին և ոգուն ԵԱՀԿ մարդկային չափանիշների հարթության օրակարգում:
Անդրադառնալով ցեղասպանության կանխարգելման, հիշատակման և կրթության ոլորտում Հայաստանի ազգային փորձառությանը՝ Աշոտ Հովակիմյանը հիշատակեց Երևանում 2017թ. նոյեմբերին «Քրիստոնյաների և կրոնական այլ խմբերի անդամների հանդեպ ատելության շարժառիթով հանցագործությունների կանխարգելումը և դրանց հակազդումը. հեռանկարներ ԵԱՀԿ-ից և անդին» խորագրով ԵԱՀԿ խորհրդաժողովի անցկացումը:
Խորհրդաժողովի շրջանակներում նախարարի տեղակալ Հովակիմյանը երկկողմ հանդիպում ունեցավ ԵԱՀԿ Իտալիայի նախագահության համակարգող խմբի ղեկավարության և Իտալիայի ԱԳՆ բարձրաստիճան այլ պաշտոնյաների հետ: Կողմերը քննարկեցին իտալական նախագահության առաջնայնությունները և ԵԱՀԿ շրջանակներում համագործակցության հարցեր:
