Փետրվարի 21-ին՝ ժամը 16։00-ին, Շուշիի «Նարեկացի» արվեստի միությունում կկայանա կենտրոնի արտթերապիա խմբակի սաների աշխատանքների ցուցահանդեսը`«Ժամացույցը և ժամանակները» խորագրով:
«Ժամացույցը և ժամանակները» խորագրով ցուցահանդես կկազմակերպվի Շուշիի «Նարեկացի» կենտրոնում
ՍՏԵՓԱՆԱԿԵՐՏ, փետրվարի 15, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Շուշիի «Նարեկացի» արվեստի միության ադմինիստրատոր Մարիամ Անդրեասյանը՝ ավելացնելով, որ ցուցահանդեսին ներկայացվելու է մոտ 25 աշխատանք:
Նրա խոսքով՝ արտթերապիայի խմբակը Շուշիի «Նարեկացի» արվեստի միությունում գործում է 2010 թվականից, որի ղեկավարն է հոգեբան և արտթերապևտ Հասմիկ Եսայանը:
«Այս տարիների ընթացքում բազմաթիվ հոգեբանական սեանսներ անցած երեխաների ձեռքի աշխատանքները ժամանակ առ ժամանակ ներկայացվել են ցուցահանդեսներում: Կենտրոնի երեք տաղանդավոր սաներ Երևանի Ջոն Կիրակոսյանի անվան դպրոցում տեղի ունեցած «Տաթև» հիմնադրամի նախաձեռնած «Արի ճախրե՛նք կամ ստեղծի՛ր Տաթևիկի կերպարը» 6 ամիս տևած մանկապատանեկան մրցույթ-փառատոնում արժանացել են երեք պատվավոր մրցանակների»,- նշել է Մ. Անդրեասյանը՝ ավելացնելով, որ դասարանը մասնակցել է նաև Թիֆլիսում կայացած «Թղթե հագուստ» խորագրով միջոցառմանը:
Նշենք, որ բոլոր ցանկացողների համար մուտքն ազատ է: