Ստեփանակերտի Մեսրոպ Մաշտոցի անվան հանրապետական գրադարանում այսօր տեղի է ունեցել միջոցառում՝ նվիրված Արցախյան շարժման 30-ամյակին:
Արցախյան շարժման 30-ամյակին նվիրված՝ Ստեփանակերտում տեղի է ունեցել միջոցառում
ՍՏԵՓԱՆԱԿԵՐՏ, փետրվարի 15, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել Արցախի պետական պատմաերկրագիտական թանգարանի տնօրեն Մելանյա Բալայանը: Նա հակիրճ խոսել է Արցախյան շարժման մասին՝ ներկայացնելով շարժառիթը, ընթացքը և ձեռքբերումները:
«Բոլորս էլ գիտեինք հայ ժողովրդի պատմությունը, առանձնապես նրա մի հատվածի՝ Արցախի նկատմամբ կատարված կամայականությունների մասին: Արցախյան շարժման արդյունքում մենք ձեռք բերեցինք անկախություն, և սա այն կարևոր արժեքն է, որ ունեցանք մենք՝ արցախցիներս: Այս ամենը մեծագույն նվաճում էր մեր կողմից և ես կարծում եմ, որ 30 տարիների ընթացքում մեր մյուս կարևոր ձեռքբերումը մեր պետականությունն է: Արցախյան շարժման արդյունքում մենք ձեռք բերեցինք անկախ պետականություն, որը հայության ամենամեծ նվաճումն է: Այսօրվա մեր խնդիրն է ամրապնդել մեր պետականության հիմքերը և ազգովի լծվել նրա շենացման գործին: Անշուշտ, արցախցիներիս վերջնական նպատակը մայր Հայաստանին վերամիավորվելն է»,- մասնավորապես ասել է Մ. Բալայանը:
ԱՀ Ազգային ժողովի «Ժողովրդավարություն» խմբակցության ղեկավար Վարդգես Բաղրյանն էլ, խոսելով Արցախյան շարժման կարևոր ձեռքբերումների մասին, նշել է, որ Ղարաբաղյան շարժման վերջին փուլի ամենակարևոր ձեռբերումներից մեկն այն է, որ հայ ժողովուրդը դարձավ միասնական, վստահ իր ուժին:
«Պատահական չէ, որ Արցախյան պատերազմի ժամանակ ողջ հայությունը ոտքի կանգնեց: Մենք պետք է պահպանենք մեր այս ձեռքբերումները և, հույսներս միայն մեզ վրա դնելով, շարունակենք պաշտպանել մեր հայրենիքը,-ասել է Վ. Բաղրյանը և ավելացրել,- ցավալի է, որ այսօրվա սերունդը այնքան էլ լավ չգիտի Արցախյան շարժման մասին: Հարկ է, որ սերնդեսերունդ փոխանցվի այս հերոսական իրադարձությունները»:
Այնուհետև Արցախյան շարժման մասին խոսել և իրենց հիշողություններով ներկաների հետ կիսվել են շարժման ակտիվ մասնակիցներ Սոկրատ Խանյանը և Մաքսիմ Միրզոյանը:
Միջոցառման վերջում ցուցադրվել է նաև Արցախյան շարժման մասին պատմվող վավերագրական ֆիլմ: