Ընթացիկ տարում առանձնահատուկ ուշադրություն է դարձվելու արտաքին աշխարհի հետ տնտեսական կապերի զարգացմանը:
Առանձնահատուկ ուշադրություն է դարձվելու ներդրումների ներգրավանը. Մասիս Մայիլյան
ՍՏԵՓԱՆԱԿԵՐՏ, փետրվարի 19, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ փետրվարի 19-ին ասել է ԱՀ արտաքին գործերի նախարար Մասիս Մաիլյանը՝ ավելացնելով, որ Արցախի տարբեր կառույցների կողմից պատրաստված բիզնես ծրագրերի հիման վրա ԱԳՆ ներկայացուցիչներն աշխատանքներ են կատարելու արտերկրում գործարար շրջանակների հետ՝ փորձելով ներդրումներ ներգրավել Արցախի տնտեսության համար:
Մ. Մաիլյանը նշել է նաև, որ 2018 թ.-ին գերատեսչության առջև դրված առաջնահերթություններից է լինելու նաև միջազգային ասպարեզում Արցախի դրական կերպարի ձևավորումն ու պահպանումը՝ մասնավորապես տեղեկատվական քաղաքականության ոլորտում:
«Պետք է մշակվի տեղեկատվական քաղաքականության ընդհանուր ռազմավարություն և պատրաստի գործիքակազմ՝ ճգնաժամային տարբեր հրատապության աշխատանքներ ապահովելու համար: Սա ևս այն դասերից է, որը պետք է քաղենք ապրիլյան պատերազմից հետո, և այս տեղեկատվական քաղաքականության ռազմավարությունը մեր գերատեսչությունը պետք է մշակի»,- ասել է Մ. Մաիլյանը՝ հավելելով, որ այս ուղղությամբ արդեն նախնական հանդիպումներ են եղել տարբեր գերատեսչությունների մամուլի ծառայությունների հետ: