Այսօր՝ փետրվարի 19-ին, Արցախի Հանրապետության նախագահի նստավայրում տեղի է ունեցել Արցախյան ազգային-ազատագրական շարժման 30-րդ տարեդարձի կապակցությամբ և Արցախի Հանրապետությանը մատուցած ծառայությունների համար պարգևատրման հանդիսավոր արարողություն:
ԱՀ Նախագահի նստավայրում տեղի է ունեցել պարգևատրման հանդիսավոր արարողություն (լուսանկարներ)
ՍՏԵՓԱՆԱԿԵՐՏ, փետրվարի 19, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ նախագահ Բակո Սահակյանը «Գրիգոր Լուսավորիչ», «Մեսրոպ Մաշտոց» շքանշաններով և «Վաչագան Բարեպաշտ», «Մխիթար Գոշ»,«Անանիա Շիրակացի» և «Երախտագիտություն» մեդալներով պարգևատրել է մի խումբ անձանց, որոնց մի մասին՝ հետմահու:
Իր խոսքում Նախագահ Սահակյանն Արցախյան շարժումը որակել է որպես մեր ժողովրդի նորագույն պատմության ամենավառ էջերից մեկը:
«Այդ պարգևները ձեր ամենօրյա անձնվեր ծառայության և քրտնաջան աշխատանքի գնահատականն են: Դուք կանգնած եք եղել Արցախյան շարժման ակունքներում և արել եք հնարավորը մեր անկախ պետականության կայացման ու զարգացման, հարազատ ժողովրդի ու հայրենիքի պաշտպանության գործում: Այսօր էլ ձեզնից շատերը շարունակում են իրենց արժանի ներդրումը բերել մեր երկրի առջև ծառացած խնդիրների լուծման և նրա բարգավաճման գործին: Համոզված եմ, որ այս պարգևները նոր լիցք կհաղորդեն ձեր աշխատանքին, կօգնեն ավելի արդյունավետորեն իրականացնել ձեր հայրենանվեր առաքելությունը,-ասել է Բ. Սահակյանը և ավելացրել,- այս տոնը պարտավորեցնում է մեզ՝ լինել ավելի ուժեղ ու միասնական, շարունակաբար ամրապնդել մեր անկախ պետականությունը, երկրի պաշտպանունակությունն ու անվտանգությունը, զարգացնել տնտեսությունը, բարելավել բնակչության կենսապայմանները, լուծել սոցիալական խնդիրները: Վստահ եմ, որ բոլորս միասին, համատեղ ուժերով կիրականացնենք մեր ժողովրդի նվիրական իղձերն ու նպատակները՝ մեր մեջ վառ պահելով 1988-ի ոգին»:
ԱՀ նախագահի կողմից «Մեսրոպ Մաշտոց» շքանշանի արժանացած ԱԺ պատգամավոր Արթուր Թովմասյանն իր խոսքում շնորհակալություն է հայտնել իրեն պարգևատրելու համար՝ վստահեցնելով, որ այսուհետ ևս ինքը կշարունակի իր ծառայությունը մատուցել հայրենիքի շենացման գործին:
ԱՀ նախագահի կողմից «Մեսրոպ Մաշտոց» շքանշանի արժանացած ՀՀ տարածաշրջանային հետազոտությունների կենտրոնի ավագ վերլուծաբան Դավիթ Շահնազարյանն էլ ասել է, որ որևէ հայորդու համար չի կարող լինել ավելի մեծ հպարտություն, քան ԱՀ պետական պարգևի արժանանալը:
«Այն շարժումը, որ Արցախում սկսվեց 30 տարի առաջ, հիմք դրեց հայոց 2 պետականությունների ստեղծմանը: Մենք մեր երազանքը դարձրինք նպատակ, իսկ նպատակը՝ գործ: Մենք հիմքը դրեցինք մեր երազների իրականացման գործընթացի: Հավերժ փառք բոլոր այն հայորդիներին, ովքեր իրենց կյանքը զոհաբերեցին՝ հանուն այսօրվա Արցախի պետականության»,- հավելել է Դ. Շահնազարյանը:
«Երախտագիտություն» մեդալի արժանացած, Շուշիի «Կաճառ» գիտական կենտրոնի տնօրեն Մհեր Հարությունյանն իր խոսքում մասնավորապես ասել է. «Այս պարգևը կարելի է համարել Արցախյան շարժման մերօրյա փուլի՝ երիտասարդ սերնդի մասնակիցների հավաքական գնահատականը: Այս պարգևատրումները մեզ պարտավորեցնում են ավելի մեծ պատասխանատվությամբ ծառայել մեր նորանկախ երկրին»:
ՀՀ «Ընդդեմ իրավական կամայականության» ՀԿ գործադիր տնօրեն Լարիսա Ալավերդյանը, ով ևս Նախագահի կողմից արժանացել է «Մեսրոպ Մաշտոց» շքանշանի, ասել է, որ Արցախյան շարժման ողջ գործընթացն ուրախությունից բացի հպարտություն է ներշնչում բոլորին:
«Ես կարծում եմ, որ այս պարգևը ոչ միայն ինձ է հասցեագրված, այլև ողջ արցախահայությանը»,- նշել է Լ. Ալավերդյանը:
Միջոցառմանը ներկա էին Հայ Առաքելական Եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը, ԱԺ նախագահ Աշոտ Ղուլյանը, պետնախարար Արայիկ Հարությունյանը, բարձրաստիճան այլ պաշտոնյաներ: