Ոչ ֆորմալ կրթության ծրագրի շրջանակներում այսօր Արցախի պետական համալսարանում ՀՀ տարածաշրջանային հետազոտությունների կենտրոնի ավագ վերլուծաբան, ՀՀ քաղաքական գործիչ Դավիթ Շահնազարյանը հանդես է եկել «Ղարաբաղյան շարժման դերը պետականաշինության գիտակցության ձևավորման հարցում» թեմայով դասախոսությամբ:
ՀՀ քաղաքական գործիչ Դավիթ Շահնազարյանն ԱրՊՀ-ում հանդես է եկել դասախոսությամբ
ՍՏԵՓԱՆԱԿԵՐՏ, փետրվարի 19, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել ԱրՊՀ ռեկտոր Մանուշ Մինասյանը, ով ներկայացրել է Դ. Շահնազարյանի գործունեության մասին՝ նշելով նաև նրա Ղարաբաղյան շարժման առաջամարտիկ լինելը:
Դ. Շահնազարյանը՝ խոսելով թեմայի մասին ասել է, որ Արցախյան շարժման դերը պետական գիտակցության ձևավորման գործում ամբողջական էր, քանի որ պետականությունը շարժման արդյունք էր:
«Արցախը` որպես պետություն, ձևավորվել է պայքարում, զարգացել է պայքարում և պայքարով էլ հասնելու է միջազգային ճանաչման»,-նշել է Դ. Շահնազարյանը:
Բանախոսի խոսքով՝ այսօր օրակարգային է Արցախի հարցը, որի ուղղությամբ լուրջ աշխատանքներ են իրականացվում Արցախի և Հայաստանի իշխանությունների կողմից:
«Այսօրվա երիտասարդներդ պետք է լինեք գրագետ, բազմակողմանի զարգացած, բարձր ինտելեկտով օժտված, որովհետև դուք եք լինելու մեր երկրի շենացման ու զարգացման գործի վաղվա նվիրյալները: Դուք պիտի ավարտին հասցնեք Արցախի միջազգային ճանաչման գործընթացը»,-նշել է Դ. Շահնազարյանը:
Հանդիպման վերջում Դ. Շահնազարյանը պատասխանել է ուսանողների, դասախոսների և լրագրողների հարցերին:
