Ղարաբաղյան շարժումը՝ 1988 թվականի փետրվարի 20-ը, հայ ժողովրդի միասնության, վճռականության և ազգային զարթոնքի ժամանակն էր, որը դարձավ հայ ժողովրդի վերածննդի օրը։
Արտակ Բեգլարյան. Գլխավոր հաջողությունը մեր հայրենիքի սահմանների պաշտպանությունն է
ՍՏԵՓԱՆԱԿԵՐՏ, փետրվարի 21, ԱՐՑԱԽՊՐԵՍ: Պատմության մեջ անջնջելի հետք թողած այս փառահեղ օրվա առթիվ ScanNews.am-ի հարցին, թե ի՞նչ նշանակություն ունեցավ այս երեսնամյակը Արցախի և արցախցու համար, Արցախի Մարդու իրավունքների պաշտպանի աշխատակազմի դեպարտամենտի ղեկավար Արտակ Բեգլարյանն ասաց. «Մեզ համար առաջնայինն ազգային արժանապատվության հարցն է, բայց նաև պայքար՝ մարդու իրավունքների, ժողովրդավարության համար, որն օրինակելի շարժում դարձավ ողջ կոմունիստական տիրապետության ներքո գտնվող տարածքներում՝ էական ազդեցություն թողնելով խորհրդային հասարակությունների ժողովրդավարացման գործընթացի վրա: Երեսուն տարվա հեռվից կարող ենք արձանագրել՝ իրականում ճիշտ ճանապարհ էինք ընտրել, և կարողացանք տեր կանգնել մեր հայրենիքին, մեր ազգային ժառանգությանն ու մեր իրավունքներին, և տասնամյակներ շարունակ արդյունավետորեն պաշտպանում ենք այդ արժեքները՝ ցավոք, մեծ զոհողությունների գնով: Այս ճանապարհով առաջ ենք գնում դեպի միացման վերջնական նպատակը, ու բոլորս էլ գիտենք, որ սկզբնական նպատակը միացումն է եղել, և այժմ էլ հասկանում ենք, որ մենք արդեն միավորված ենք մեկ հայրենիքում՝ ուղղակի տարբեր իրավական կարգավիճակներով»:
Հարցին, թե ի՞նչ բացթողումներ կան, որ պետք է արվեր այս տարիների ընթացքում և ի՞նչ չհասցրեցինք անել, պարոն Բեգլարյանը նշեց. «Գլխավոր հաջողությունը մեր հայրենիքի սահմանների պաշտպանությունն է և այդ պաշտպանված սահմանների ներսում մեր ժողովրդի բարեկեցության և արժանապատվության ապահովումը: Իհարկե, դեռ բավականին երկար ճանապարհ ունենք անցնելու ավելի բարեկեցիկ, ավելի արժանապատիվ պայմաններում ապրող հասարակություն ունենալու համար, բայց, համոզված եմ՝ այդ օրն էլ կտեսնենք: Եթե հետադարձ հայացքով նայում ենք 25 կամ գուցե հենց 30 տարի ետ, ապա կտեսնենք, որ անհամեմատ ավելի շատ զրկանքներ էինք կրում, քան հիմա, որ այն ժամանակ գոյության պայքար էինք մղում, իսկ հիմա մտածում ենք զարգացման մասին»: