Նախօրեին Քաշաթաղի շրջանի հարավային թևի Իշխանաձոր գյուղում, Արցախյան շարժման 30-ամյակին նվիրված, տոնական միջոցառում է տեղի ունեցել:
Արցախյան շարժման 30-ամյակին նվիրված՝ Քաշաթաղի Իշխանաձոր համայնքում միջոցառում է կազմակերպվել
ՍՏԵՓԱՆԱԿԵՐՏ, փետրվարի 21, ԱՐՑԱԽՊՐԵՍ: Այս մասին «Արցախպրես»-ին տեղեկացրին ԱՀ Քաշաթաղի շրջանի «Մերան» պաշտոնաթերթից՝ ավելացնելով, որ միջոցառմանը ներկաները՝ շրջվարչակազմի ղեկավարի տեղակալ Արտուշ Մխիթարյանի գլխավորությամբ, գյուղի՝ Արցախյան ազատամարտում մարտիրոսված քաջորդիներին նվիրված նորակերտ հուշակոթողի մոտ ծաղիկներ են խոնարհել, ապա տնկել 30 սոսու ծառ՝ հիմնելով Արցախյան շարժման 30-ամյակին նվիրված պուրակ:
Աղբյուրի փոխանցմամբ՝ այնուհետև, 30 տարի առաջ հնչած կարգախոսները վանկարկելով, հավաքվածները երթով անցան գյուղի կենտրոնական փողոցով և հասան Ազատամարտիկների թաղամաս, որտեղ 2017 թվականին «Հայրենասեր» հասարակական-բարեգործական կազմակերպության ֆինանսավորմամբ կառուցվել է մարզադաշտ (Այն կոչվում է 2016թվականի ապրիլին հերոսաբար մարտիրոսված Անդրանիկ Զոհրաբյանի անունով): Այստեղ Իշխանաձորի դպրոցականները հանդես են եկել ռազմահայրենասիրական երգերի կատարումով, պարով ու ասմունքով: Ելույթ են ունեցել նաև «Բերձոր» համույթի երգիչ-երաժիշտները:
Ներկաներին ողջունել ու տոնի առթիվ շնորհավորել է Ա. Մխիթարյանը: Խոսելով ներկա սերնդի մասին՝ նա ասել է, որ այսօր ոչ միայն մեր շարժումը, այլև անկախության սերունդը 30 տարեկան է:
«Այս սերունդն ավելի ճիշտ է դաստիարակվել, քանզի, ի տարբերություն մեզ, նրանք ծնված օրից սնվել են ազգային-ազատագրական ոգով: Ներկա և գալիք սերունդներն ի զորու են մեր սկսած ազգային-ազատագրական պայքարը հասցնել տրամաբանական ավարտին»,- մասնավորապես նշել է Ա. Մխիթարյանը:
Լուսանկարները՝ Քաշաթաղի շրջանային «Մերան» պաշտոնաթերթի