Անցած տարվա ընթացքում Արցախում գրանցված հանցագործությունների ընդհանուր թիվն աճել է 62-ով կամ 8.8%-ով՝ կազմելով 766 դեպք:
Անցած տարի Արցախում գրանցված հանցագործություններից բացահայտվել է շուրջ 98.4%-ը
ՍՏԵՓԱՆԱԿԵՐՏ, փետրվարի 22, ԱՐՑԱԽՊՐԵՍ: «Արցախպրես»-ի հաղորդմամբ՝ այս մասին փետրվարի 21-ին ԱՀ ոստիկանությունում կայացած կոլեգիայի նիստին ասել է ԱՀ ոստիկանության պետի առաջին տեղակալ Անդրանիկ Հակոբյանը՝ նշելով, որ խնդիրը հիմնականում պայմանավորված է մարդու և հասարակական անվտանգության դեմ ուղղված որոշ հանցագործությունների աճով:
«Հանցագործությունների աճին զուգընթաց 1.8%-ով բարելավվել է դրանց բացահայտման արդյունավետությունը։ Այսպես բացահայտման տոկոսում հաշվվող 742 դեպքից բացահայտվել է 678-ը կամ 98.4%-ը, 2016թ՝. 689-ից 652-ը կամ 96.6%-ի համեմատ:
Հանցավորության ընդհանուր կառուցվածքում աճել են մարդու (անձի) (30.8%-ից 35.4%), հասարակական անվտանգության, հասարակական կարգի և բնակչության առողջության (29.8%-ից 30.4%) և շրջակա միջավայրի անվտանգության (2.1%-ից 2.9%) դեմ ուղղված հանցագործությունների տեսակարար կշիռները, նվազել` սեփականության (27.8.%-ից 23.4%), պետական իշխանության, ծառայության և կառավարման կարգի (7.8%-ից 6.5%) ու տնտեսական գործունեության դեմ ուղղված հանցագործություններով (1.6%-ից 1.4%)»,- ասել է Հակոբյանը և ավելացրել, որ հաշվետու տարում 16 դեպքով (243-ից 259) աճել են միջին ծանրության, անփոփոխ են մնացել (47/47) ծանր, իսկ 5-ով (14-ից 9) նվազել են առանձնապես ծանր հանցագործությունները:
Խոսելով անչափահասի կողմից կատարած հանցագործությունների մասին՝ ԱՀ ոստիկանության պետի առաջին տեղակալը նշել է, որ 2017թ.-ին 44 անչափահասի կողմից ընդհանուր կատարվել է 45 հանցագործություն, 2016թ.` 39 անչափահասի կողմից կատարված 39 դեպքի համեմատ։
Ներկայացնելով հանցագործությունների բացահայտման ուղղությամբ ոստիկանության ստորաբաժանումների կողմից իրականացված աշխատանքները, Ա. Հակոբյանը նշել է¸ որ ընդհանուր բացահայտման ցուցանիշի (2017թ.` 98.4%, 2016թ.` 96.6%) բարելավման պարագայում աճել է նաև միջին ծանրության հանցագործությունների բացահայտման ցուցանիշը: Գրանցված 259 դեպքերից բացահայտվել է 240-ը կամ 98.8%-ը (2016թ.` 243-ից 231-ը կամ 97.1%-ը), իսկ ծանր հանցագործություններով նվազել` 47-ից բացահայտվել է 29-ը կամ 85.3%, 2016թ՝. 47-ից 38-ը կամ 88.4%-ի համեմատ:
«Վարույթում գտնվող քրեական գործերով հաշվառված 779 (2016թ.՝ 739) հանցագործություններով նույնպես աճել է բացահայտման ցուցանիշը, որտեղ բացահայտման տոկոսում հաշվվող 755 դեպքերից բացահայտվել է 683-ը կամ 97.4%-ը, 2016թ.՝ 724-ից 678 կամ 96.4%-ի համեմատ»,- մանրամասնել է Հակոբյանն ընդգծելով, որ հանցագործությունների ընդհանուր թվի աճի արդյունքում հանրապետությունում աճել է նաև հանցավորության մակարդակը 10.000 բնակչին բաժին ընկնող հանցագործությունների թիվը հաշվետու տարում կազմելով՝ 52.4, 2016թ.-ի 48.5-ի համեմատ: