Այսօր՝ փետրվարի 22-ին, «Ազատ հայրենիք» կուսակցության կանանց խորհրդի անդամներն այցելել են Մարտունի քաղաք և շրջանի Վարանդա, Բերդաշեն, Թաղավարդ համայնքներ և օգնություն ցուցաբերել կարիքավոր, սակավակարող և բազմազավակ մի շարք ընտանիքների:
«Ազատ հայրենիք» կուսակցության կանանց խորհուրդն աջակցություն է տրամադրել կարիքավոր մի շարք ընտանիքների (լուսանկարներ)
ՍՏԵՓԱՆԱԿԵՐՏ, փետրվարի 22, ԱՐՑԱԽՊՐԵՍ: «Ազատ հայրենիք» կուսակցության (ԱՀԿ) կանանց խորհրդի անդամները հագուստ և կոշկեղեն են նվիրել 10 ընտանիքների:
«Արցախպրես»-ի թղթակցի հետ զրույցում ԱՀԿ կանանց խորհրդի նախագահ Ռոմելա Դադայանն ասել է սա իրենց հերթական օգնությունն է, որ իրենք ցուցաբերում են այդպիսի ընտանիքների:
Մեր զրուցակցի խոսքով՝ նրանց այցելած ընտանիքներից վատթարագույն պայմաններում է ապրում Թաղավարդ գյուղի բնակիչ Կիմա Առստամյանի ընտանիքը:
«Մենք որոշեցինք, որ մեր ուշադրության կենտրոնում պահենք և հնարավորինս աջակցենք նրանց: Մենք պարտավոր ենք հոգալ նման ընտանիքների մասին, չէ որ այդ ընտանիքներում երեխաներ են մեծանում»,-ասել է Ռ. Դադայանը:
Խոսելով առաջիկա ծրագրերի մասին՝ Ռ. Դադայանը տեղեկացրել է, որ նույն առաքելությամբ վաղը՝ փետրվարի 23-ին էլ մեկնելու են նաև Մարտակերտի, Ասկերանի և Շահումյանի շրջաններ:
«Առաջիկայում կայցելենք նաև Քաշաթաղի և Հադրութի շրջաններ: Ընդհանուր առմամբ նախատեսել են նյութական օգնություն տրամադրել 38 ընտանիքների»,-հավելել է Ռ. Դադայանը:
Թաղավարդի բնակիչ, 4 երեխաների պապիկ Վագիֆ Առստամյանը մեզ հետ զրույցում ասել է. «Երեխաների մայրն արդեն տարուց ավելի է, ինչ լքել է իրենց, հայրն էլ զինծառայող է: Ես ու կինս ենք հոգ տանում երեխաների մասին: Ամսական թոշակս կազմում է 37 հազար դրամ, 36 հազար էլ երեխաների նպաստն է: Ստացած գումարը չի բավարարում երեխաների կարիքները հոգալուն: Շնորհակալ եմ ԱՀԿ կանանց խորհրդի անդամներին մեր նկատմամբ ուշադրություն ցուցաբերելու համար»:
Իսկ 6 երեխաների հայր Ռևիկ Ավանեսյանը, հայտնելով իր երախտագիտությունը կանանց խորհրդի անդամներին, նշել է, որ այդ վերաբերմունքն իրենց ոգևորում է: «Առանց մայրական խնամքի երեխաներիս հետ ապրում եմ իմ կիսավեր տանը՝ չունենալով կենցաղային նորմալ պայմաններ»,- ավելացրել է Ռ. Ավանեսյանը:
