Փետրվարի 24-ին Արցախում մեկնարկել է դպրոցական առարկայական օլիմիպիդայի հանրապետական փուլը. այն ավարտվելու է մարտի 16-ին:
Օլիմպիադայի մասնակիցների մոտ բնագիտական առարկաներից դեռևս պասիվություն կա. ԿԳՍ փոխնախարար
ՍՏԵՓԱՆԱԿԵՐՏ, մարտի 6, ԱՐՑԱԽՊՐԵՍ: «Արցախպրես»-ի թղթակցի հետ զրույցում ԱՀ կրթության, գիտության և սպորտի փոխնախարար Միքայել Համբարձումյանն ասել է, որ անցյալ տարվա 417 աշակերտի փոխարեն, այս տարի հայտերով ներկայացված են 422 հոգի:
Խոսելով օլիմպիադայի մասնակիցների ակտիվության մասին՝ փոխնախարարը նաև ասել է, որ, անցած տարվա համեմատ, այս տարի էական փոփոխություններ չի նկատվում:
«Վերջին 2 տարիներին մաթեմատիկա առարկային ընդգրկել ենք 5-րդ, 6-րդ և 7-րդ դասարանցիներին ևս. դա է պատճառը, որ այդ առարկայից մասնակիցների թիվն ավելացել է»,-նշել է Մ. Համբարձումյանը և տեղեկացրել, որ հանրապետական օլիմպիադայի փուլում ընդգրկված 15 առարկաներից 7-ի (մաթեմատիկա, ֆիզիկա, քիմիա, կենսաբանություն, հայոց եկեղեցու պատմություն, հայոց լեզու և հայոց պատմություն) մրցույթներն արդեն ավարտվել են:
Խոսելով բնագիտական առարկաների մասին՝ Մ. Համբարձումյանն ավելացրել է, որ այստեղ դեռևս պասիվություն է նկատվում:
Մեր զրուցակցի խոսքով՝ բնագիտական առարկաներին շրջանային (քաղաքային) փուլին մասնակցել է 1180 աշակերտ:
«Քիմիա առարկայից այս տարի հանրապետական փուլ է անցել 3 հոգի, մաթեմատիկայից՝ 45, կենսաբանությունից՝ 8, ֆիզիկայից ՝ 21, աշխարհագրությունից՝ 27-ը:Ողջունելին այն է, որ ինֆորմատիկա առարկայից անցած տարվա 4 աշակերտի դիմաց, այս տարի մասնակցել է 13-ը. նշանակում է՝ այս առարկայի նկատմամբ մեծ հետաքրքրություն կա»,-մանրամասնել է փոխնախարարը:
Իսկ օլիմպիադայում ընդգրկված հարցերի դժվարության մասին խոսելիս՝ Մ. Համբարձումյանը նշել է, որ բացի դպրոցական ծրագրերից, հարցաշարերում ընդգրկված են այլ հարցեր ևս, որը օլիմպիադաների համար շատ բնական է:
«Եթե գնահատման հարցում դժգոհություններ և բողոքներ են լինում, ստուգողների կողմից դրանք վերանայվում են»,-հավելել է Մ. Համբարձումյանը:
