Այսօր՝ մարտի 20-ին, Ստեփանակերտի Շառլ Ազնավուրի անվան մշակույթի կենտրոնում տեղի է ունեցել «Պոլ Էլյուարի տուն Ֆրանկոֆոնիայի կենտրոն» հիմնադրամի կողմից կազմակերպված Ֆրանկոֆոնիայի միջազգային տոնին նվիրված մրցույթ-փառատոնին մրցանակային տեղեր գրաված մասնակիցների պարգևատրման արարողությունը:
Ֆրանկոֆոնիային նվիրված մրցույթ-փառատոնի արցախցի մասնակիցները պարգևատրվել են
ՍՏԵՓԱՆԱԿԵՐՏ, մարտի 20, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ «Պոլ Էլյուարի տուն Ֆրանկոֆոնիայի կենտրոն» հիմնադրամի կողմից Ստեփանակերտ, Մարտունի և Հադրութ քաղաքների դպրոցների մի խումբ աշակերտներ և ֆրանսերենի ուսուցիչներ պարգևատրվել են հուշանվերներով, պատվոգրերով, ֆրանսերեն դասագրքերով:
«Պոլ Էլյուարի տուն ֆրանկոֆոնիայի կենտրոն» հիմնադրամի տնօրեն Նելլի Ավանեսյանը, ողջունելով և շնորհավորելով ներկաներին, ասել է, որ 39 տարի առաջ Նիգերիայում հիմնվել է Ֆրանկոֆոնիայի միջազգային ասոցիացիան՝ հիմնականում լեզվի իմացության և այնպիսի ընդհանուր արժեքների վրա, որոնց Արցախի բնակիչները ևս կողմնակից են:
«Այդպիսի արժեքներ են համերաշխությունը, խաղաղությունը, մարդու՝ կրթություն ստանալու իրավունքը: Այսօր ֆրանսերեն լեզուն համարվում է միջազգային կառույցներում օգտագործվող 3-րդ և համացանցի 4-րդ լեզուն: Ամբողջ աշխարհում կան 900 հազար ֆրանսերենի ուսուցիչներ և 272 միլիոն ուսանողներ, որոնք սովորում, խոսում են ֆրանսերեն: Ներկայումս Արցախում ունենք 21 ֆրանսերենի ուսուցիչներ և 3551 աշակերտներ, ուսանողներ, որոնք սովորում են ֆրանսերեն»,- մասնավորապես ասել է Ն. Ավանեսյանը:
Միջոցառմանը ներկա ԱՀ կրթության, գիտության և սպորտի նախարար Նարինե Աղաբալյանն էլ նշել է, որ Ֆրանկոֆոնիայի օրը Արցախում միշտ էլ նշվել է, բայց այս անգամ այն ունի այլ՝ մրցույթ-փառատոնի ձևաչափ, որին մասնակցելու հնարավորություն է ընձեռնվել հանրապետության՝ ֆրանսերենն ուսումնասիրող բոլոր դպրոցների աշակերտներին:
«Շատ ուրախալի է, որ, բացի Ստեփանակերտից, մրցանակային տեղերի են արժանացել նաև Հադրութի և Մարտունու դպրոցականները: Այսօր Արցախյան օրեր են կազմակերպվում Ֆրանսիայի տարբեր քաղաքներում, և Արցախի պաշտոնական պատվիրակությունները մասնակցում են այդ միջոցառումներին:
Հոկտեմբերին Հայաստանը հյուրընկալելու է Ֆրանկոֆոն երկրների գագաթաժողովի բոլոր մասնակիցներին, և Հայաստան են ժամանելու ֆրանկոֆոնիայի անդամ երկրների ղեկավարներ, կառավարության անդամներ:
Մենք նույնպես փորձելու ենք անմասն չմնալ»,- նշել է Ն. Աղաբայանն՝ ավելացնելով, որ սեպտեմբերից ընդլայնվելու է ֆրանսերենի ուսուցումը ոչ միայն հանրակրթական դպրոցներում, այլև նախնական, միջին մասնագիտական և բարձրագույն ուսումնական հաստատություններում՝ տարեցտարի ավելացնելով ֆրանսերենի իմացությամբ ուսուցիչների և աշակերտների քանակը:
«Պար» անվանակարգում առաջին տեղ գրաված Հադրութի մանկապատանեկան ստեղծագործական կենտրոնի տնօրեն Իրինա Թամրազյանն էլ շնորհակալություն է հայտնել կազմակերպիչներին՝ արված աշխատանքը գնահատելու համար:
Միջոցառմանը մրցանակային տեղեր գրաված որոշ մասնակիցներ հանդես են եկել երաժշտական և պարային ելույթներով: