ԱՀ գրողների միության և Գրիգոր Նարեկացի համալսարանի համատեղ նախաձեռնությամբ այսօր տեղի է ունեցել միջոցառում՝ նվիրված պոեզիայի միջազգային օրվան:
Ստեփանակերտում կայացել է միջոցառում՝ նվիրված պոեզիայի միջազգային օրվան
ՍՏԵՓԱՆԱԿԵՐՏ, մարտի 21, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել ԱՀ գրողների միության նախագահ Վարդան Հակոբյանը:
Նա ներկաներին շնորհավորել է տոնի կապակցությամբ և նշել, որ պոեզիան յուրաքանչուրի համար ընդունելի է այնքանով, որքանով մարդ մոտ է բանաստեղծությանը:
Վ. Հակոբյանի խոսքով՝ յուրաքանչյուր ոք էլ պետք է սիրի պոեզիան, խորասուզվի գեղեցիկի աշխարհում և վայելի այն:
Գրիգոր Նարեկացի համալսարանի դասախոս, գրող Արկադի Թովմասյանն իր խոսքում ասել է, որ գյուղական աշխարհն ինքնին պոեզիա է. նրանք, ովքեր իրենց մանկությունն անց են կացրել գյուղում, վայելել են այդ հաճույքը:
Բանաստեղծուհի Ալիսա Բաղդասարյանի համոզմաբ էլ՝ պոեզիան մարդու տվայտանքների, սիրո, հիասթափության, հույսի, սպասումների և այլ ապրումների գեղեցիկ դրսևորումն է:
Ըստ նրա՝ պոեզիան մարդու ցանկությունները, հոգևոր զգացումներն ընդգծում և ընդհանրացնում է թե՛ իրականության և թե՛ երևակայության սահմաններում:
Ա. Բաղդասարյանն ավելացրել է նաև, որ պոեզիայի միջոցով կարելի է ներթափանցել մարդու հոգևոր աշխարհ և այնտեղ գտնել գեղեցիկի բազում երանգներ:
Միջոցառման ընթացքում արցախցի գրողները և համալսարանի ուսանողները հանդես են եկել բանաստեղծությունների արտասանությամբ և երաժշտական համարներով: Սլայդներով էլ ցուցադրվել և հնչվել են հայ դասական գրողների ստեղծագործություններն իրենց իսկ ձայնով:
Հիշեցնենք, որ 1999-ին ՅՈՒՆԵՍԿՕ-ի 30-րդ վեհաժողովում որոշում է ընդունվել մարտի 21-ը նշել որպես պոեզիայի միջազգային օր: ՅՈՒՆԵՍԿՕ-ի որոշման մեջ մասնավորապես ասվում էր. «Պոեզիան կարող է պատասխան դառնալ ժամանակակից մարդու առջև ծառացած ամենասուր և ամենախոր հոգևոր խնդիրներին, սակայն դրա համար անհրաժեշտ է պոեզիայի վրա բևեռել հասարակության հնարավորին չափ լայն շերտերի ուշադրությունը»: